為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 05 月 07 日

西醫工會新會長上任 5職員玩總辭遺爛帳

多次被指選舉不公嘅香港西醫工會,喺三月六日終於由梁漢輝醫生擊敗冧莊十八年嘅楊超發,當選新一屆會長。工會一夜變天,正當會員以迎來新氣象之際,該會近日傳出「人事大地震」,五名工作多年嘅職員,突然齊齊「總辭」劈炮唔撈,日前更忽然收到律師行追收三十多萬元律師費。
楊超發十八年來首度落敗,好多人以為西醫工會只不過改朝換代,但係自新會長上場後,卻發現會務及行政管理問題多多,不單十八年來未有報稅,部分帳目更是含糊不稱。梁漢輝一心要撥亂反正,怎知當選兩日後回到西醫工會辦事處時,五名職員不約而同請辭,仲要求即時離任。

 

 

被追收三十多萬律師費,梁漢輝感到莫明其妙,「估唔到個會除咗帳目問題,仲有咁多氹要填,非常頭痛!」

 


據知五人分別擔任文員或秘書,年資由兩年至十多年不等,離職理由都係話「想轉下環境」、「身體唔好」之類。 梁漢輝同陸偉亮曾極力挽留,可惜唔成功,惟有馬上招聘新員工,同時自己落手落腳整理工會帳目。就喺呢個時候,佢哋發現部分有關帳目嘅重要文件不翼而飛,多番追問已離職人士仍不得要領,惟有向相關人士發律師信追究。
就喺梁漢輝忙於查數之際,日前佢收到一封律師信,要求佢支付三十多萬元律師費,「無啦啦要找呢筆數,真係好愕然!點解會使咗咁多錢?原來早前二月二十七日舉行周年大會選舉時,有候選人請咗兩名律師來驗票,一共驗了十二小時,律師費達二十四萬元。」
「咁都未算,三月六日再次舉行周年大會選舉,有人更請來三名律師,要求佢哋再次重新檢查五百多張授權票,律師驗咗十二小時,花費十多萬元,即平均每驗查一張票,就要畀五至六百元。」梁漢輝坦言,現時工會儲備約有二百多萬元,今次支付三十多萬元律師費後,又要應付十八年來嘅欠稅,恐怕工會好快「乾塘」。
西醫工會現時有逾一千五百名會員,一直為會員提供網上進修課程,疫情下仍無停過,但自從職員走晒,無人協助搞Zoom會議後,有醫生提議中止課程,但梁漢輝大力反對,認為課程是由藥廠贊助,突然唔搞好難同對方交代。
由於會內帳目不清問題無法解決,正尋求法律意見,不排除採取法律行動。就會務及管理被指混亂一事,本刊曾向前會長楊超發查詢,但直至截稿前仍未有回覆。

擔任西醫工會會長十八年,楊超發早前首度落敗。

 

西醫工會早前舉行周年大會選舉,曾爆發會員間激辯嘅火爆場面。