為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 04 月 29 日

七席改選四人不求連任 醫學會換屆爆退選潮

年前爆發「黃藍對決」嘅香港醫學會,七月將舉行會董換屆選舉,今次有七席需要改選,由於截止報名期係五月四日,候選人之間嘅拗手瓜戰陸續浮面。醫學會會董選舉向來鬥到七彩,但今屆七名會董,竟有四人已表明不尋求連任,令唔少會員感到詫異。
消息人士透露,當中包括腎科醫生陳小劍、心臟科醫生林賀、腸胃肝臟科醫生吳志豪及眼科醫生冼佩儀。有指部分醫生對立法會嘅新選舉制度下,取消醫學界一席感到無癮,認為業界聲音已不獲重視;亦有醫生慨歎疫情下難以搞活動,做個掛名會董都無乜意思。
知情人士續說:「以往醫學界搞唔少聯誼聚會,包括打波、游水、慈善音樂會等,但限聚令下,乜活動都搞唔到。」
四名醫生不尋求連任,屬歷來少見,唔少會員紛紛打探佢哋求去原因。不過四人似乎唔想講太多,只係簡單一句「唔選嘞」。睇番四人背景,分別服務咗醫學會幾年至十幾年不等,算係中堅分子,當中吳志豪醫生更係前公共醫療醫生協會會長,江湖地位唔低。

 

陳小劍(左起)、吳志豪、林賀及冼佩儀醫生,不約而同唔再尋求連任。

 

 

 

醫學會喺七月十三日將舉行換屆選舉,現任會董李福基醫生(圓圈示)將尋求連任。

 


雖然有四人決意退出,但家庭科醫生李福基及精神科醫生莊勁怡,均會尋求連任,至於黃品立醫生據知仍在考慮是否參選。
有人辭官歸故里,有人漏夜趕場,聽聞有「藍營」醫生將派出七人參選,加埋三名尋求連任嘅會董,將會出現十人爭七席,戰況依然激烈。不過七位「藍醫」候選名單好神秘,截至本周一仍未曝光。
有人推測「藍營」今次捲土重來,與去年七月元老級會長蔡堅以一張十二人名單大獲全勝有關。蔡堅作風一直被指「偏黃」,佢與團隊勝出後,更被媒體形容為「黃營全勝」。呢次「藍醫」拉隊對撼,有指是為「復辟」醫學會,也有說是為九月嘅選委戰鋪路。
姑勿論挑戰動機係乜,醫學會去年經歷一場鬥到牙血都出埋嘅會長及會董選舉後,的確令會內「藍黃對疊」更加分明。自從中央通過改革香港選舉制度,罕有地取消醫學界功能界別,改為跟衞生服務界合併後,有「藍醫」歸咎於醫學會部分醫生立場太激,予人搞對抗形象,導致話事權被削。早前喺醫學會會董會上,就有醫生提出要求會董們就失去醫學界議席負上責任,提出總辭。可惜該動議因無人和議而不了了之。