為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 04 月 15 日

立法會十大選區曝光 建制泛民鬥搶位

十二月立法會選舉在即,新制下地區直選議席由三十五減至二十席,全港五大選區亦會拆為十個選區,每區選出兩名議員。政壇近日亦對如何劃分十個選區議論紛紛。
本刊收到獨家消息,十區分布藍圖已經擬定,當局最快於本周三(十四日)提交立法會審議,需經三讀通過然後才實施。十區劃分方案就係港島分兩大選區;九龍分三大選區;新界則分為五大選區(詳見附表)。
香港政治及管治學院召集人朱兆麟分析說:「每個大選區平均人口約為六十七萬至八十萬人口,選區人數明顯較前增多,但議席少咗,會令候選人拉票時更奔波。喺『雙議席單票制』下,預料對樁腳『疊馬』嘅民建聯及工聯會最為有利。」
綜合各方消息人士,港島「中西南區及離島」選區,預料係民建聯立法會議員張國鈞、民主黨主席羅健熙及民建聯副主席陳學鋒之爭。張國鈞係中西區前區議員,喺該區嘅票倉強勁,雖然南區同離島唔係佢「地盤」,但呢排張國鈞已密密拍片關注海洋公園發展同躍動港島南項目,加強該區的關注度。

地區直選議席大減,建制派將爭崩頭,部分議員或需轉跑道。

 

喺雙議席單票制下,政界預料由建制、泛民平分秋色。

 


羅健熙話晒係南區區議會主席,南區鐵粉唔少,加上港島係泛民最強票倉,派佢搶位料無難度。最終當然要視乎佢能否到入閘,若然入唔到,呢個位好大機會成為中西區前副主席陳學鋒嘅囊中物。
轉睇港島「東區及灣仔」選區,新民黨主席葉劉淑儀、工聯會議員郭偉強及立會議員謝偉俊係三大熱門參選人。葉太多次喺港島立選展示「票后」威力,拎一席真係易過食生菜,至於郭偉強,亦有強勁票倉喺北角,想當選亦唔難。至於謝偉俊,佢喺一九年區選中,係少數保住建制地盤嘅灣仔區議員,喺港島嘅「食力」不容低估。
九龍「觀塘」選區,現任民建聯立會議員柯創盛預料好大機會同民主黨副主席梁翊婷及工聯會鄧家彪拗手瓜。曾失落立選議席嘅鄧家彪近年以工聯會九龍東總幹事身份大鋪地區人脈,出戰觀塘區絕對唔奇,而梁翊婷話晒係觀塘區議員,代表泛民喺九龍區搶位亦合情合理。
講到「九龍城及黃大仙」選區,預料由經民聯梁美芬及早前因為選舉司法覆核而被拉落馬嘅前議員陳凱欣跑出呼聲高。「油尖旺及深水埗」區,大熱人選非民建聯鄭泳舜及民協創黨元老馮檢基莫屬。
至於新界「將軍澳、西貢、馬鞍山」選區,料有份拗手瓜者包括民建聯立會議員葛珮帆、西貢區議員方國珊及新民黨李梓敬。「沙田、大圍、大埔」選區,預計實政圓桌召集人田北辰挾現任議員嘅人氣空降呢區,跟新民黨容海恩大拗手瓜都未定。
「葵青及荃灣」區,民建聯立會議員陳恒鑌應該十拿九穩,另一度就係工聯會麥美娟同民記葵青區議員郭芙蓉之爭。「屯門及部分元朗」選區,黑馬包括民建聯周浩鼎、立會議員何君堯及熱血公民鄭松泰。而「北區及部分元朗」選區,以民建聯陳克勤、來自鄉事派勢力嘅北區區議員陳月明及新民主同盟任啟邦,係三大熱門人選。

朱兆麟認為,部分資深建制議員或退位予年輕一代接棒,今屆立會選舉將現新舊交代。