為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 04 月 10 日

獨家踢爆公開話無打算離港 郭榮鏗闔家「走佬」

去年十一月十一日,人大常委會發布決議,對擔任香港立法會議員資格增加規定,四名泛民主派議員即時被褫奪議席。立法會前法律界議員郭榮鏗係被DQ嘅其中一人,佢當日同另外三位DQ議員好高姿態咁走出議事廳,十日後再公開宣布退出政壇,結束八年政治生涯,更以「人生如棋,落子無悔」來形容自己走過的路、做過的事,最後就話暫時無計劃離開香港。
話就話抽身政壇,不過郭榮鏗仲一直喺社交網活躍,三日唔埋兩日就發新帖,為被捕嘅泛民議員同手足打氣,之但係,即使昔日戰友楊岳橋、譚文豪被捕入獄,都唔多覺佢去探監。今年一月,郭榮鏗喺社交網宣布佢嘅處男作新書《當守的道》已出版,同樣未見佢出面宣傳或搞簽名會之類。

月前聲稱暫時無意離港嘅郭榮鏗(右),同太太黃愛恩(左)前後腳離開香港,遠赴加拿大,至今未返港。

 


本刊收到獨家消息,曾公開話暫時無計劃離開香港嘅郭榮鏗,其實喺舊年十一月二十一日接受完各大媒體訪問後唔夠一個星期,就靜雞雞留低老婆同兩個仔,自己一條友「走佬」。消息話佢先去咗英國倫敦,之後再轉飛加拿大,至今未返香港。咁啱得咁蹺,佢太太黃愛恩亦喺今年二月中同兩個年幼兒子飛咗去加拿大溫哥華,估計好大機會係會合郭榮鏗,一家團聚。
郭榮鏗揀落腳喺加國,其實有迹可尋。出生於亞省愛民頓嘅佢,早已係加拿大公民。八一年隨家人回流香港,九一年再跟隨胞兄郭榮臻去英國升學,九九年喺倫敦大學國王學院取得法學學士後返港發展,○六年更成為大律師後,隨即加入公民黨踏足政壇。
一二年佢由黨友吳靄儀手中接棒出任法律界議員,成為當年其中一位最年輕嘅議員。當年郭榮鏗曾聲稱為做議員連加籍都放棄埋,如今再次重投加國懷抱,可能需要重新申請入籍都未定。
郭大狀眨眼離港四個幾月,唔少前黨友都感到愕然。佢太太黃愛恩雖然人在溫哥華,但似乎未完全同香港劃清界線,事關佢喺將軍澳日出康城仍持有一個物業,現時由家人協助打理,用作收租。據資料顯示,該單位喺○九年以佢個人名義購入,作價五百二十九萬,持貨至今升值唔少。黃愛恩都係法律界中人,曾任事務律師,任職過胡關李羅律師行,不過生仔後就專心相夫教子,已離開「法界」多年。

郭榮鏗(右一)被人大常委會DQ後,隨即宣布退出政壇,連黨友被捕入獄,都唔多覺佢去探監。

 

悄悄離港嘅郭榮鏗,近月頻頻喺Facebook發帖關注泛民被捕議員嘅狀況。