人生下半場

朋友L正當盛年，少有病痛，最近為了解自己適合打哪一隻疫苗走去見醫生，想了解下血管夠唔夠健康，點知驗血結果發現自己原來有糖尿病，空腹血糖指數高達十三點四（正常是五至六），嚇一大跳。醫生都擔心影響到心臟，着她先控制血糖，緊接再睇心臟科。
無端驗血驗出壞消息，朋友L心情自然七上八落，不過佢亦十分積極面對，自動戒掉多年飲食壞習慣，謝絕高油高糖高盬食物。不過醫生叫佢至少戒一半碳水化合物，以往食一碗飯，呢家只能吃半碗，頭一兩日情緒有點低落。佢歎話人生行到一半，才發覺原來有些欲望配額忽然無咗；薯片、可樂、雪糕等零食通通無得留低。
當我們年輕時，總覺得時間和精力無窮無盡，天高海闊想到就做，想吃便吃，那會想到若干年之後的景象？筆者另一位舊友更經典，他屬於無肉不歡類型，更愛打邊爐酒肉齊來；年前突然生了一場大病，吃了大半世的肉類，就在醫生勸戒下一下子要割席。他說仍然不時會掛着豬牛羊的香味，不過為保命仔，餘生都要與肉類分手。

 

講番患上糖尿病的朋友L，佢話呢家積極找尋其他適合的食物，原來也有很多選擇，只是以前沒有留意；至於人生重點，他亦轉了，變得更重視和家人相處的時間，更知道吾生也有涯，有些事要趕快做，「生命不由人，會盡力做，其他交畀個天啦。」
佢話呢家諗番轉頭，才醒起這些日子以來好易口渴、飲好多水、吃得更多體重卻減輕了，加上視力有點模糊，佢仲以為自己老花，原來這都符合糖尿病徵，好彩無端走去驗血，否則肯定更嚴重。
是的，這一路走來，在不同的時間，我們都會失去一些，可能是友情、可能是財富、可能是健康，可是在過程中，我們同樣會得到另一些，重新重視家人關係、建立運動習慣、又或者扚起心肝斷捨離。
朋友L呢家將自己這故事掛在口邊，見人就講，提醒人家一定要定時做身體檢查，凡是隱疾都係早知好過唔知，愈遲知愈大件事。