為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 03 月 19 日

「和理非」泛民老將謀出山

全國人大通過涉及修改香港選舉制度後,立法會地區直選可能只餘下二十席,加上候選人需經過審查委員會篩選,民主派嘅參選空間將大大收窄。近日唔少泛民團體紛紛同「民陣」割席,更凸顯激進派已無市場,相反主打溫和路線嘅「和理非」民主派卻蠢蠢欲動。
早前獲邀出席港澳辦主任夏寶龍舉辦「愛國者治港」座談會嘅新思維主席狄志遠,呢排更加人氣急升。一六年成立嘅新思維,黨員人數比創黨時少咗大約一半,政壇活躍度唔高,而狄志遠亦打晒開口牌透露有意組新黨參選,更加唔排除自己再次參選嘅可能性。
有民主派人士慨歎,現時參選空間近乎零,狄志遠就仍然好樂觀,「空間係收窄咗,但唔代表失去生存空間。以激進手法爭取民主當然不能接受,只要係溫和理性派應有空間的。」言下之意,佢去馬成數極高。
狄志遠坦言一向有同支持民主嘅有心人定期聚會,睇見近排政治環境有變,大家不禁思考民主派未來仲可以點樣發揮影響力?被問到組黨路線圖係點,佢就賣關子話仲度緊。
狄志遠忽然彈出,令人對一眾民主派老將充滿遐想。政圈流傳民協創黨元老兼前主席馮檢基復出呼聲甚高,民主思路召集人湯家驊亦被傳係「黑馬」。
已轉型做政界KOL嘅馮檢基亦被看高一線,但被問會否出山重返議會,基哥就話呢刻無時間諗呢個問題,擺明唔想太快表態。溫和民主派中,仲有一位呼聲甚高,就係湯家驊。本刊向佢查詢,湯聽罷哈哈大笑說:「我都一把年紀,唔會(參選)了,留番機會畀年輕人吧,但民主思路會睇下有否年輕梯隊成員有興趣參政,會盡力協助佢哋。」
政壇風水輪流轉,近年一直彈唔起嘅「和理非」,終於等到有空間再抬頭,未來隨時成為泛民大阿哥。至於建制派亦醞釀大執位。由於選委界別議席將會大增,立法會議員又係當然選委,有建制中人近日提議,讓資歷有番咁上下嘅議員「轉跑道」,循選委界別出選,騰出原有嘅功能組別或直選議席,等新人上位,咁就可以確保建制派拎到最多議席咁話。資深議員轉循選委跑道出戰,聽落比打直選戰筍好多,難度亦無咁高。不過到底最終有幾多議員會揀轉跑道,相信有排協調嘞。

主打溫和路線嘅馮檢基(左起)、湯家驊及狄志遠,人氣忽然急升,更被視為問鼎新一屆立會議席嘅泛民黑馬。

 

 

 

建制派商議緊大執位,部分資深議員或改循選委界別出選。