為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 03 月 10 日

埋肥佬黎堆 變搞事橋頭堡 民陣瀕散檔

喺反修例風波期間不斷號召市民上街嘅民間人權陣線(民陣),近日被踼爆沒有社團註冊,又指其涉嫌收受「美國國家民主基金會」(NED)資助舉辦多場示威活動,疑違反《港區國安法》而被取締。召集人陳皓桓第一時間唔認有收相關資助,想同美國劃清界線,之不過屬於民陣成員嘅街坊工友服務處(街工)就急急跳船,退出「民陣」,相信未來會有更多成員同佢割席,「民陣」這個招牌恐成歷史。

岑子杰(中)挾「民陣」召集人之名快速上位,還高票當選成為沙田區議員。

有消息人士透露,「民陣」近年嘅角色變晒質,已引起政府及中央高度關注,「佢哋以往會以獨立身份,協助泛民不同團體組織遊行、集會及示威等活動,但自一九年反修例爆發後,喺岑子杰任召集人之下埋咗肥佬黎堆,出席其大宅飯局,自此民陣就反客為主,不斷主導遊行議題,變成泛民嘅搞事橋頭堡。」
○三年成立嘅「民陣」,由五十多個關注人權、民主、勞工、基層及少數族裔等團體組成,幾乎年年包辦「元旦遊行」同「七一遊行」,每次都會在冇申請下順便擺街站籌募經費,但籌到幾多就甚少公開盤數。直至一九年六月爆發反修例風波,「民陣」立即成立「反送中受傷被捕者人道支援基金」,並聲稱喺六月十六日嘅大遊行期間,籌得七百三十八幾萬元。
岑子杰更食住人氣上升嘅勢頭,走去參選區議會選舉,奪得沙田瀝源選區議席,令「民陣」喺政圈嘅影響力大大提升;而一直力撐反修例示威嘅美國國會,一九年十月更頒咗個「公民力量獎」畀「民陣」,兩者關係有幾老友,可想而知。
睇番反修例風波期間,「民陣」舉辦嘅遊行集會,總有不少成員團體派人撐場。但係「民陣」現在被指食美國佬茶禮,岑子杰又涉《港區國安法》被控告,有消息指班成員好擔心受牽連,除街工外其他成員團體亦正考慮退出,泛民呢個橋頭堡,恐怕不日散檔。

反修例風波期間,「民陣」以唔同主題舉辦遊行集會,最終卻演變成街頭暴亂。

「民陣」喺警方反對遊行下,仍多次號召流水式集會,被指為「偽遊行」。