為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 03 月 05 日

控47人串謀顛覆政權 人大修訂選舉框架 揭中央撥亂反正路線圖

因參與泛民初選而在今年一月被警方以涉嫌違反《港區國安法》拘捕嘅攬炒派人士,忽然被叫提早本周日返警署報到,其中四十七人更即時被落案起訴「串謀顛覆政權」,周一喺西九龍裁判法院提堂,事件震動政壇。
有掌握中央想法嘅資深人大及政協透露,警方國安處喺北京兩會開幕前起訴攬炒派,對中央來說,係撥亂反正嘅第一步,三月初兩會開幕,將會就香港未來選舉制度訂出全新框架,最終選舉制度如何改革,就要睇中央撥亂反正嘅路線圖,相信不論區議會、立法會,以及特首選委會嘅選舉辦法,會有翻天覆地改變在所難免!」
前全國人大常委范徐麗泰日前有份出席由國務院港澳辦主任夏寶龍主持嘅深圳座談會,佢喺會後亦透露自己嘅建議,當中包括取消一百一十七個現時由區議員互選嘅特首選委名額。佢話區議會並非政權嘅區域組織,唔能夠喺政權當中起作用,直言取消呢一百一十七席,都唔會影響地區以及政府諮詢組織嘅工作。

因參與初選被落案起訴嘅林卓廷(左圖)、戴耀廷(中圖)及民主黨胡志偉(右圖前)將面臨審訊,神情落泊。

 


話就話係建議,但有資深人大直言,取消區議員互選嘅一百一十七席選委,幾乎係事在必行。至於選委嘅空缺由誰來填補?建制派一直建議由全國政協當中的港區政協擔任,范太都有呢個諗法,於是佢喺會後都打晒開口牌。除考慮搵政協頂上外,范太亦提出可以搵全國有香港代表嘅組織,如全國工商聯、青聯、婦聯等香港區代表加入選委會,一句講晒,就係要落實「愛國者治港」。
除咗改革選委會組成辦法,立法會嘅選舉模式恐怕都要變。范太提出取消立法會五個超區議席,認為立法會地區直選應至少劃分成十個選區,建議唔再沿用比例代表制,而係採用「雙議席單票制」。
范太分析,當初立法直選之所以採用比例代表制,無非希望社會有多元聲音,等細黨都有代表晉身立會發聲。不過現時得票低於百分之十嘅當選議員,唔少係立場偏激嘅激進派。所以佢建議改為得票最高嘅兩名候選人當選,而參選人「入閘」前,更要先取得特首選委提名,意味鼓吹「港獨」或「攬炒」意識嘅激進泛民想入閘,難度會大大增加。
至於取消「超區」五席後,騰出嘅議席將會點選法?消息人士透露,由新功能界別人士替代嘅機會甚大,預計將以「半協商」方式產生,同現時商界(一)、商界(二)及工業界(一)議席嘅產生辦法相似。
還有區議會嘅角色,更加會有翻天變革。有人向中央提議將區議會大瘦身,包括削議席、削資源及削人工。知情人士直言,現時攬炒派喺區議會不時傳出佢哋亂批撥款,有見及此,當局或大幅削減區議會嘅撥款權,只保留修橋、補路等真正造福地區嘅工作先畀佢哋批。此外亦會考慮削減區議員嘅議辦運作撥款,避免有人借請人為名,支持抗爭者為實。至於區議員嘅薪酬,聽聞有機會被瘦身,不過具體下調幾多,就有待進一步研究。

夏寶龍喺深圳舉行座談會,聽取香港社會各界代表對完善香港特區選舉制度嘅意見。

 

中央出重手整頓立法會選舉制度,或將重劃選區及取消「超區」五席。