K11 MUSEA 出招快保安全

早前政府決定在農曆新年假後放寬食肆營業時間到晚上十時，新冠疫情又再反覆。尖沙咀K11 MUSEA的名潮食館群組截至昨日擴大至累計有四十四人染疫。證明抗疫最大關鍵的確是去到邊都要戴着口罩，而在餐廳除下口罩進食便變得高危。政府抗疫專家、港大微生物學系講座教授袁國勇，周一下午聯同衞生防護中心及食環署官員曾到K11 MUSEA視察。佢話係間餐聽地下一層嘅鮮風供應有問題，茶水間亦擺放已使用碗碟，可能造成交叉感染。除此以外，整體上商場本身是安全的。
本周日的尖沙咀，人流非常多，其實該區也有其他商場有食肆傳菜員中招，不過除了該間中招的菜館，商場都繼續營業，好多一家大細渾然不覺在區內逗留，如果有隱性傳播鏈，都應該幾大件事。
除了一些市民，未知政府官員是否也一樣進入抗疫疲勞狀態？對於又爆一鑊似係無計可施，源頭截不住，來來去去都係封場加強檢兩招。其實K11 MUSEA反應算十分快速，亦比起政府要求做得更多，當二月二十七日名潮食館群組感染擴大，佢哋已主動決定商場停業兩日並全面消毒；後來更主動延長閉場安排至本星期五（三月五日），確保所有員工和租戶員工可以做到兩次檢測，兩次都呈陰性，才再在本星期六（三月五日）開場。
此外，佢哋又立即安排幾部流動檢測車停在商場門口（見圖），等所有員工和租戶員工可以立即做到檢測，免卻排政府社區檢測中心條隊或者到處找檢測包。港大感染及傳染病中心總監何柏良喺出席商台節目時，都話商場反應快，做法相當負責任。不過佢亦建議，政府應擴大疫苗優先接種群組至食肆員工。
今次名潮食館出現屬「超級帶菌者」的清潔工，以致咁多人中招。有人就質疑點解佢病咗仍然開工？呢位清潔工據說係在二月十四日檢測過，當時結果是陰性，十八日感到唔舒服，但因為未到十四日後再檢測的要求，於是十九日照常開工。老實說，食肆晚市時段剛復開，作為基層打工仔，好驚無咗份工，好難話有病就唔開工，當然佢亦不會知道自己係超級帶菌者。如果政府認為食肆員工算高危群組，可能考慮縮短十四日檢測一次這個時限？抗疫措施不到位，市民、餐廳、商場，以致整個社會，都只能不停捱打，只係唔知幾時輪到自己中招……抗疫抗到今時今日，好多市民都怨聲載道了。