為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2021 年 03 月 03 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

牛年股市的上下半場

今期繼續請另外四位股評朋友傾傾股市前景。佢哋分別係香港股票分析師協會副主席郭思治(郭Sir)、光大新鴻基財富管理策略師溫傑(Kenny)、中國通海證券投資策略聯席總監阮子曦(Harry)以及安里控股主席兼行政總裁黃偉康(Andrew)。
疫情期間,宅經濟抬頭,新經濟股成為投資者新寵。之前介紹過美國有FANG,港股亦有以科網龍頭為首嘅ATMXJ(即阿里巴巴、騰訊、美團、小米和京東)。有媒體喺鼠年收爐時總結恒生指數成分股表現,發現頭五個大贏家當中,科網股佔兩席位,其中美團錄得升幅逾三點二倍,以榜首姿態大幅拋離第二位。恒生中國新經濟指數亦印證此分類股發展驚人,鼠年內指數有七成幾漲幅。一眾股評朋友都睇好牛年新經濟股繼續帶旺股市。
恒生指數有望於年內迎來大改革,剔除傳統藍籌股,取而代之納入更多新經濟股,以反映經濟實況。各老友普遍覺得恒指要於上半年衝破歷史高位毫無懸念。Harry用估值計算方法,預測指數躍升兩個標準差到三萬三千八百點左右。Andrew同樣覺得市場氣氛熾熱嘅環境下,恒指突破紀錄後延續百分之八至十升勢屬意料之內,因此上望三萬七至三萬八。郭Sir更憧憬新經濟股份於未來嘅增長空間足以拉動更多資金投入,大膽作出最牛預測,估計恒指高見四萬點,投資策略建議偏向進取。
Kenny認同長遠而言北水和優質股份來港第二上市可增加港股吸引力,有助交投量蒸蒸日上。但有見短期內不明朗因素仍然存在,取態相對審慎,相信恒指到三萬一至三萬二就會遇到阻力,貼近歷史高位水平徘徊。

一眾股評認為牛年投資分上下半場,策略大不同。

 


所謂英雄所見略同,大部分股評都預料股市會展現先高後低格局。除咗上星期其他專家提出對疫情嘅憂慮,Andrew亦點出股市或者已經透支,提醒投資者為央行收水時股市潛在嘅「冧檔」風險做好準備。大家一致認同牛年下半年會出現較多變數,股市會經歷動盪,Harry和Kenny預期恒指低位喺兩萬五至兩萬七區間。我個人認為年初低位後,未來半年會顯現牛市特徵,展望向上可達三萬五千點,進入下半年則會較為波動,上落波幅可達到六至八千點。
成班投資高手上嚟拜年,當然會帶埋利市。綜觀兩集嘉賓嘅選擇,佢哋傾向推介獲國策支持行業,例如新能源電動車製造業。而內地政府加強規管線上支付工具,亦變相令內銀股值得留意。另外亦推薦後疫情經濟復甦板塊,涵蓋衣食住行,與內循環和內需相關,呢個板塊以舊經濟股為主。最後唔少得當下強勢股,除上述ATMXJ之外,近排生物科技和健康護理股亦受追捧,認為可以留意。
上星期財爺陳茂波發表新一份財政預算案,有計劃上調股票印花稅稅率,由現時買賣雙方各付百分之〇點一,提高至百分之〇點一三,增幅達三成。宣布當日港股下挫近千點,北水淨沽出近人民幣兩百億元。政策觸動市場短期反應實屬常見,至於長期會為股市帶來乜嘢結構性影響就仍需觀察。