為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2021 年 03 月 02 日

與子偕老不簡單 銀齡再牽手重拾愛的感覺

近年,世界各國的銀髮族離婚率都有上升趨勢。隨着夫婦退休、子女成家,不少銀齡夫婦都會選擇在人生下半場各自各精彩。而今期的兩位主角,夫妻關係雖然也曾經歷高低潮,但他們堅信,能夠相知相愛相伴數十載既是緣分,也應好好珍惜。

國強(右)和秀蓮(左)結婚至今三十三年,坦言關係曾陷入膠着,而自二人在幾年前相繼退休,相處的磨擦更多,幸得計劃的幫助讓他們重拾戀愛的感覺。

 

兩年前,本欄曾訪問六十歲的黃國強與妻子陳秀蓮。當時,兩口子為了退休後能健健康康地共度餘生,而參加「賽馬會流金匯」的運動計劃,而二人的一言一語間,充滿着愛與關懷。如今再訪問他們,始知他們的這段關係來之不易。「同太太相識四十年,結婚之後十幾年關係好似貌合神離一樣,甚至有一刻會氣餒,苦惱可以點樣同佢行落去。」國強形容。

計劃讓國強憶起當年追求秀蓮時的甜蜜感覺,而當重看當年二人拍下照片,更令二人感恩這幾十年來的相知相伴。

 

反思婚姻的意義


不過,就如很多的愛情故事一樣,開始的時候總是甜蜜美好,「工作上認識太太,當時一見到佢,就覺得佢笑得好靚,好清秀純樸,於是膽粗粗追求佢。同事知道我對佢有意思,就幫我打聽佢幾時生日、有咩喜好。放工就專登等埋佢一齊走,陪佢去北角搭船。有時為咗見佢,仲唔返夜校走堂。」
國強說罷,身邊的秀蓮忍不住低頭暗笑,說道:「你有走堂咩?我竟然唔知!但我好記得佢當年因為我而轉睇另一份報紙,我爸爸知道後話,如果一個男人肯為你轉睇另一份報紙,佢真係好鍾意你。」國強如此熱烈追求,直至三年後秀蓮一次心急過馬路,才讓他有機會一拖她的手,自此成為拖友,「我哋都係對方嘅初戀,愛情故事雖然好老土,但我覺得能夠同秀蓮一齊,係好難得、好有緣嘅一件事。」國強笑說。
直至一九八七年,二人結婚,數年後女兒和兒子相繼出世,昔日拍拖的甜蜜卻開始減退,甚至出現衝突。「畢竟我哋各自都對大家有一定嘅期望,就如我希望婚後可以擺脫以往嘅家庭管束,自由地生活,點知老婆成日話我做得唔好,單係早上食唔食佢煮嘅麥皮,我哋都可以有爭拗。到仔女出世,佢又話我唔理仔女。那段日子,我覺得佢好似同我搞對抗。」說罷,秀蓮又插嘴道:「記得有次帶對仔女去我個妹屋企,我見仔女同表弟妹玩得好開心,就打畀老公話唔返屋企煮飯,點知佢好嬲,亦令我好唔開心。」
這些生活上的小事與磨擦,令二人的關係膠着了十多年,「我好怕處理衝突,鍾意逃避,但老婆份人好真,有咩事都不吐不快。佢迫我面對,我就更加想避,甚至覺得佢在怪我。」
為了尋求出路,二人曾報讀一年的婚姻培育課程以及相關婚姻導師培訓班,學習婚姻的意義與夫婦的相處之道。「讀完之後,我發現佢變咗好多,有一次我哋放學如常行去地鐵站,佢竟然講笑話氹我笑,那一次我真係好開心,搵番佢追我時嘅感覺。」秀蓮說。
簡單的課程,除了讓二人重拾快樂,更讓他們深入了解對方的性格、對婚姻的期望和需要,「舉例如我知道咗老公份人鍾意用行為表達情感,我學識要讚佢多啲,感謝佢為頭家嘅付出。佢亦好似一塊鏡,讓我睇清楚自己,提醒我對人對事都要寬容一啲。」她續說。

二人最近為計劃拍攝短片,教授如何製作天然護膚膏,為此二人特地做了大堆資料搜集,並視這計劃的義工服務為他們退休生活的一些小確幸。

 

重新學習相愛

二人中途出家,難得找到相處之道,然而當數年前二人相繼退休,關係又再改變,「一退休無咗份工,成個人好似迷失咗一樣,情緒好抑鬱,而太太一直苦心經營同仔女嘅關係,但自從佢哋開始出嚟做嘢,慢慢唔再對阿媽無所不談,對佢打擊好大。以往幾十年,我哋就好似拍檔一樣經營頭家,如今好似責任已完成,唔知往後人生重心喺邊。」
為此,二人決定重新審視婚姻的意義,並參加了賽馬會「恩愛50+」銀齡婚姻同行服務旗下的「REFOCCUS夫婦婚姻成長課程」。服務由香港賽馬會慈善信託基金捐助,並由香港公教婚姻輔導會推行,旨在協助像國強兩夫婦一樣的銀髮夫婦改善夫妻關係。「好多銀髮夫婦都因為面對退休、子女離巢等因素,而令婚姻關係出現磨擦,最近疫情關係亦有好多夫婦求助,而計劃就透過講座、工作坊、夫婦聚會、興趣班等,從中讓參加者學習關顧彼此嘅需要,改善關係。」負責計劃的家庭服務社工鄭瑞連說。
馬會慈善事務部主管王兼揚表示:「不少退休人士面對生活改變,夫婦之間的磨擦可能有所增加,影響雙方感情。馬會透過支持此計劃,旨在為他們提供一系列樂齡活動及婚姻支援服務,藉此鞏固夫妻關係,促進家庭和諧。」
「課程有份婚姻關係問卷,令我知道原來太太好鍾意同我相處嘅精心時刻。見計劃會舉辦行山、興趣班等多元化活動,於是我就陪佢參加。起初覺得咁做只係遷就佢,表達愛佢嘅方式,但過程中令我搵到快樂,明白退休之後,大家唔單只係家庭拍檔,反而有大把時間經營番段關係,做番一對情侶,搵番拍拖嘅感覺,一齊繼續生活落去。」如最近,二人就為計劃拍攝短片,教授如何製作天然護膚膏,「我哋有番個小目標,一齊上網研究點整,借機又拖吓佢隻手,幫佢按摩。」國強笑說。
二人退休後踏入人生下半場,決定由老夫老妻做回一對小情侶,「課程導師教曉我哋,兩公婆相處關係總有高低起跌,但只要彼此相愛,學識點相處,總能夠與子偕老。」

鄭姑娘指很多夫婦退休後,關係都會出現磨擦,而她則建議夫婦先放下情緒,找出衝突的根源對症下藥,並於必要時尋求協助。

 

                賽馬會「恩愛50+」銀齡婚姻同行服務
                   WhatsApp:5510 4580 電話:2810 1104 Facebook:refocuslove50