談藝術，你大概會說：「我識條鐵咩？」
停一停，諗一諗，Really？
專家如羅冠蘭、馬浚偉，以行動告訴你，並不。
大眾對羅冠蘭的認知，80%是因為TVB，但六十四歲的她，八十年代已是香港話劇團的中流砥柱，更是帶着碩士銜頭，在香港演藝學院授課十載的老師。
「藝術係一種創作，並不高人一等，但佢嘅特殊性，就正正適合一個人去尋找自己。我哋成日講創作嘅真善美，就係讓一個人去認識自己。」
稱羅冠蘭為「Miss」的馬浚偉，就從這點出發，創辦藝術教育中心，請得恩師為藝術顧問，還特別把工作室重新裝修，變成黑盒劇場，為的就是永續藝術的正能量，薪火相傳。
「生命唔係只得分數，我想有好嘅場地，俾一班小朋友去實踐，將來佢哋成長咗，條路都係佢哋自己去行。」
置身黑漆漆的劇場，二人仍如聚光燈般，既光且亮。

 

終身學習

近年的馬浚偉，一直從事藝術工作，撰寫舞台劇、電影劇本，有別於大眾對他的小生印象。兩年前，他開始籌備開辦藝術學院，糅合藝術與教育，至今年一月，才真正實現夢想。
「我接觸過唔少教育家，好似o依家學院嘅教育顧問羅乃萱師母，幫我睇住我嘅教育方向。我覺得o依家香港嘅學校，永遠將成績、分數擺喺第一位，所以我希望學生除咗DSE分數之外，都可以體會到學習嘅快樂。
「而Miss（羅冠蘭）就係我嘅藝術顧問，我入行之前，上過佢嘅堂，雖然只係為期三個月，但係對我嘅影響好深遠，佢一嚟到教書，已經代表咗藝術，就算只係好簡單咁講喜、怒、哀、樂，佢都會用一啲戲劇、角色做例子。」
坐在馬浚偉身旁的「Miss」，是公認的藝術家，聽到他的意念時，羅冠蘭也全力支持。「教育真係完全唔易做，因為責任好大，但佢（馬浚偉）真係身體力行去做，除咗技術上嘅教育，仲好重視學生嘅個人成長。香港喺呢方面係發展得慢嘅，喺西方好早就已經有藝術治療，我喺英國讀書（攻讀東西方戲劇研究碩士）嘅時候，都特登去咗一個藝術治療學院讀一個課程（行為及戲劇治療），去了解呢樣嘢。
「透過戲劇去尋找自己，尋找個人同角色嘅關係，喺過程期間，係能夠令人透徹地認識自己，認識人同生活。」
馬浚偉大表認同：「Miss每次講，我都會有一次反思。我做咗演藝圈二十八年，都係一步一步成長，每次揣摩角色嘅時候，都係對自己一個深層次嘅認知，同時又了解到其他人。」

除演出外，他一九年還兼任電影《生前約死後》的導演。

易地而處

抽象的概念，羅冠蘭隨即以實例說明。「我曾經喺一個夏令營，同一班中學生玩Role-play（角色扮演），叫佢哋做番自己嘅爸爸媽媽。Role-play嘅作用好好，會幫你去清理一啲情緒，俾個途徑你去發洩。
「最寶貴係，做完之後嘅討論，原來啲細路仔平時，好嬲啲父母唔俾佢哋出夜街，但當佢哋做父母嘅時候，都一樣唔想仔女出夜街，喺問佢哋原因嘅時候，佢哋先會思考到父母咁做，都係為佢哋好。所以，只要有機會俾小朋友去嘗試，就算佢哋日後唔做表演者，佢哋都會搵到自己嘅潛能。」
她如是說，全因羅冠蘭是過來人。「因為我中學遇過幾個好老師，所以我嘅志願係效法佢哋，做一個老師。喺中六嘅時候，我媽媽見到TVB藝員訓練班招生，學費三十蚊一個月，但係有演技、樂理、時代曲、中國舞、西洋舞同司儀學，而且每一科都係名師教授！七三年，是但讀一科都唔止俾三十蚊一個月啦！
「當時我對表演係零認知嘅，面試嘅時候，我都係答King Sir（鍾景輝，當時的演技導師之一），報名係因為好多嘢學，我想學晒佢，好冇大志！但係佢哋又收咗我喎！」
羅冠蘭的藝訓班同學，包括影帝周潤發、盧海鵬、吳孟達及導演林嶺東等，但她表示：「我嗰時日頭仲返緊學，夜晚上完堂只係急急腳去食個雲吞麵，就要返屋企做功課，生活冇出咗嚟做嘢嘅同學咁多姿多彩。我諗我嗰時係民智未開嘅，因為從來冇諗過簽TVB，King Sir話簽我一年，我為咗唔影響自己做老師嘅夢想，只係簽咗半年，跟住就繼續讀書。」

說到二人的演藝緣，大多數人也會想起〇八年的《秀才愛上兵》（圖），他們於劇中飾演母子，而從當事人口中的「結緣」，則是九八年播出、零對手戲份的《鹿鼎記》。

九十年代才重返「娘家」，她大多飾演慈母角色，當中《烈火雄心》中跟王喜的母子情，仍為視迷回味。