為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2021 年 02 月 25 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

股評論牛市

初五啟市後,港股展現強勁升浪。首兩個交易日,恒生指數先後突破三萬點和三萬一千點水平,創三十二個月新高。學港交所主席史美倫話齋,牛象徵財富、勤奮、堅韌及進取,送鼠迎牛,會唔會為股市帶來好意頭?初段升勢過後,後市表現又會點?我搵咗八位股評老友,分兩期同大家做個「牛市」展望。打頭陣嘅有正榮金融業務部副總裁郭家耀(Matthew)、寶鉅證券董事及首席投資總監黃敏碩(Michael)、中民證券研究部董事黃偉豪(Ravi)和富昌證券聯席董事譚朗蔚(Stevan)。
「北水」為大市帶來支撐作用。內地公私募基金紛紛加速配置港股,加上部分基金早前獲放寬投資港股比例,散戶亦爭相開戶和加大投資額,想分一杯羹,形成大量資金湧入港股。今年頭二十五個交易日,來港資金近三千七百億港元,佔去年全年淨流入六千七百億港元五成五,單日流入量佔港股總成交額兩至三成以上。難怪滙豐都喺年假前重估今年北水流入規模,由之前預計嘅八千億元人民幣,上調至一萬到一萬四千億元。

陸叔聯通一眾股評老友同大家拜年。

 


眼見仲有為數不少產品等候港股通批核,一班股評朋友都異口同聲話「北水」會係港股重要資金來源。Matthew和Michael更預測恒指可以於開局初期突破歷史高位三萬三千四百八十四點,到三萬四甚至三萬五千點先會遇上阻力。Ravi和Stevan同樣覺得第一季或上半年市況理想,恒指有條件上望二〇一八年紀錄。加上考慮到疫情仍然反覆不穩,環球央行收水機會微,投資者從股市抽走資金嘅情況照計唔會常見,因此取態較為進取,建議將風險接受程度稍為提高,以爭取更高回報。
縱使大家一致認同股市整體向好,但牛氣總唔可能咁「長氣」。佢哋認為隨住疫苗接種計劃於各國開展,疫情有望緩和,經濟會穩步復甦。市場會因而增添變數,因為會出現央行轉向緊縮政策,以及美金走向和債息流向等不明朗因素。
股評老友都出現「好淡爭持」。對於有投資者憧憬企業業績反彈,Michael就對市場承接能力抱有疑問,提醒投資者注意市場波動,慎防恒指於下半年下挫至兩萬七千五百點至兩萬八千點。Ravi嘅觀望更為保守,相信恒指跌至兩萬六千點水平先會有支持。Stevan預料股市喺第一季造好後,隨即會喺第二季進入調整期,恒指可低見兩萬七千點,呼籲散戶小心。
香港人近年熱衷投資外圍市場。各股評指美國聯儲局量化寬鬆政策致使市場資金氾濫,短期通脹固然可以帶動經濟利好股市,但長遠存在調整貨幣政策嘅需要,認為投資者應在適當時重估資產價格,為加息做好準備。至於內地市場,Ravi和Stevan都對人行嘅貨幣政策有信心,相信可以令市場平穩發展。「牛市」投資機會確實吸引,我個人仍然守住投資組合配置原則,控制注碼並趁高位鎖定部分得益,以及分散喺不同風險程度嘅股份上,未必賺到盡,但起碼唔會變「瘋牛」。