為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2021 年 02 月 20 日

I'm Not a Girl, Not Yet a Woman 鄧佩儀

新年伊始,象徵了人大了一歲,廿八歲的鄧佩儀,對人生也有一番感悟。

「我o依家呢一刻,係一個『資深少女』,我嘅年齡唔可以話係一個少女,但又未去到熟女嗰種穩重,我嘅內心深處,仲住咗一個十八歲嘅少女。所以,有一首歌都幾符合我近呢幾年嘅感覺,就係Britney Spears嘅〈I'm Not a Girl, Not Yet a Woman〉。」

十歲便舉家移民加拿大,她以英文歌作其「人生歌曲」,絕對不足為奇。

 

 

「我細個就會記熟啲歌詞,但係就唔明首歌講嘅嘢,直至近呢三年,我好感受到呢首歌。」

歌中的首句歌詞,正是「我曾以為我有所有東西的答案」,而鄧佩儀則於廿一歲當選為《國際中華小姐》冠軍,令原本在加拿大攻讀市場學的她,改變人生軌跡,回流返港入娛樂圈,投身未知之數。至今八年,由最初的「負評攝石」,進化成現在的「視迷女神」,除了現在熱播的《陀槍師姐2021》,去年她還首次孭飛,擔正做「女一」。

置身五光十色的演藝圈,她認為自己是最幸運的一群。「我覺得自己係一個好平凡嘅女仔,唔係最靚、最Sharp嗰個;身材又唔係最火辣嘅,所有嘢都唔係最好嗰個,但夾埋一齊又好似Ok。最好係,可以行屬於自己嘅路,我係感恩嘅。」

即使歲月悄悄地拿走了青春,帶來的是充滿繽紛色彩的人生,並非新正頭限定。

 

 

負評正能量

二〇二一年,是鄧佩儀入行的第八個年頭,一路走來,她的演藝路,可謂先苦後甜,出道劇集《點金勝手》,更令她成了「負評攝石」。
提起這段黑歷史,她坦言:「到o依家我都記得當時嘅負評,好似對眼淨係識瞪大、不斷眨眼、完全冇戲、把聲好弱、聽到把聲都毛管戙⋯⋯我全部都睇晒,但我覺得,要正視缺點先可以改善到嘅。
「其實拍《點金勝手》嗰四個月,喺演戲上我學到好多嘢o架,但係好可惜,之後我停咗三年,先再有拍劇嘅機會。喺冇劇拍嘅時候,我就主持咗飲食節目《搵食兵團》,初時我都做得好差o架,但睇到後期,真係見到自己有進步,所以我都幾欣慰。哈哈!」
訪問期間,鄧佩儀笑容滿面,正能量不缺,回首黑歷史如是,說到去年終於成為「女一」,更是笑得燦爛。
「我係可以保持平常心嘅女仔,無論係以前選美,定係今次做『女一』。一方面好開心,一方面又覺得好不可思議,我從來冇諗過,亦冇奢求過可以做到女主角。因為之前喺《降魔的2.0》、《機場特警》,我都有好好嘅發揮戲份,竟然鄧佩儀都做到女主角,係一個奇蹟!
「我咁講唔係因為我對自己冇信心,而係呢一行真係有好多好犀利嘅人,要靚嘅、實力派都有好多,但係機會就兩隻手都數得晒,真係要好幸運先做到嗰一個(主角),咁我好開心,可以成為幸運兒。」

鄧佩儀於八歲時,跟母親及胞兄移民加拿大,命運驅使下,二十一歲的她因選美奪冠,回流返港,展開其銀色旅途。

 

正在播映的《陀槍師姐2021》中,她跟羅子溢、洪永城有一段三角關係。