富臨飯店執行董事邱威廉，熱愛中國藝術，多年來沉醉於書法，尤其熱愛篆書，去年以十條幅的作品《出師表》，與老師及同學一起參與在大會堂舉行的書法展。
他笑言完成一天工作，每到夜闌人靜時，總愛走進書房，拿起毛筆蘸上墨水，在宣紙上遊走，一寫便兩三小時，自得其樂。
今個農曆年，他更親自揮毫，寫揮春及多幅好意頭的組合字。「呢幾幅係『招財進寶』、『日進斗金』、『日日有財見』，全部都好好意頭！疫情反覆，今年希望大家都『身體健康』，『龍馬精神』！」

他以篆書、行書和行草書體寫福字，「今年係我第一次寫賀年揮春和組合字，往年都係上完書法堂，老師寫俾我哋啲學生。」

寫書法功多藝熟，一六年寫的《小戎詩》，是他較為滿意的作品。

工聯會上課

這天相約邱威廉訪問，他準備好文房四寶和多幅作品，拍照時又拿出《心經》字帖臨摹練字，見他熟手地攤開宣紙，氣定神閒地一撇一劃的着墨。之後又寫賀年揮春和組合字，大筆一揮，不到數十秒，便寫好一個福字！「因為每年都係老師寫揮春俾我哋，之前自己未寫過，今次係第一次寫，枱面呢啲都係處男作，揀咗啲好意頭嘅字句！」
他寫字時集中專注，筆法流暢，每個字着墨一氣呵成，「寫書法開頭都係臨摹，睇你鍾意咩書體，寫到順手，熟習咗，出嚟啲字自然會靚，亦會有個人風格。只要專注同投入，你漸漸會發現，一拎起支筆就有感覺。」
邱威廉熱愛書法十多年，二千年初長期在內地工作，工餘時間就買影碟自學書法。「○二年富臨飯店喺福州開新店，之後又去廈門做房地產，長時間留喺內地，我又唔鍾意應酬，每晚食完飯冇嘢做，就喺寫字樓攞起支毛筆隨便搵啲字寫吓，跟住又買啲VCD，邊睇邊學，開頭學習柳公權楷書、柳體呢類字體，經年累月，漸漸愛上書法。」
及後返到香港，他報讀過中大校外進修嘅書法班，朋友又介紹他到工聯會學篆書和篆刻，「喺工聯會由一三年學到o依家，跟過三、四位老師，呢幾年就主要跟中帑和揭建章兩位老師學習。一個星期上兩堂，篆書、楷書，仲有篆刻，七百幾蚊十堂好抵玩。裏面其實藏龍臥虎，好多同學同老師手字都好靚，我多數都係臨摹練習，唔會有太多創作性。」

 

去年他以十條幅的作品《出師表》和同學們在大會堂展覽，其書法老師中帑﹙右圖﹚和一哥楊貫一﹙下圖﹚也來捧場。

學雕章裝裱

書法以外，他又學習雕刻，「記得一四、一五年間，同時兼學雕刻和書法，每星期要交兩份功課，忙到不得了。雕刻最花時間係起稿，真正雕刻時手起刀落就好快，四個字嘅章，個零鐘左右就完成到，雕刻刀好平o架咋，文具舖幾十蚊買到，一把可以用足一世。」
早前他更學埋裝裱，實行由寫到裱，一條龍自己搞掂。「我早前出去搵人裱畫，一幅要成三千蚊，我見何文田一間中心有課程，兩個月七堂，又走去報名學。傳統裝裱用紙托底，然後學煮漿糊，黐好待乾，一幅要兩至三個禮拜先裱好，地方仲要夠大，有啲人會用牀板掛出嚟，原來全部都係工夫錢。之後我再報深造班，學機裱，呢種用藝術膠膜加燙斗，個零鐘搞掂，快靚正。其實書法以外，周邊都好多嘢學，好多嘢玩。」
亦因為熱愛書法，間接令他收藏大量書法用紙、毛筆、和印章原石，「屋企收埋大量文房四寶，一刀紙一百張，除咗買嚟寫字，有啲名貴啲嘅紙就買嚟儲，字帖買買埋埋都有幾箱。毛筆有五六十支未開嘅，有平有貴，用完最緊要洗乾淨，保養得好，一支可以用到四、五年。」

邱威廉從術數認識紫微泰斗王亭之，「我一七年皈依，跟隨王亭之師父學佛，但卻沒有跟他學書畫和術數，關係很特別。」