為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2021 年 02 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

復原之年 小試牛刀

恭喜發財,我陸叔祝願各位東周讀者吉星高照,身體健康。舊年全世界受新冠疫情影響,實體經濟數度停頓,踏入新一年,大家都希望可以運轉乾坤,所以今日請到我好朋友玄學名家羅奇峰(Raymond),幫大家為來年把把脈,睇下牛年會唔會有一個新局面。
陸:舊年庚子鼠年,相信對好多人來講係好難忘嘅一年,新冠疫情幾近翻轉成個世界,來到辛丑牛年,從玄學角度去睇,會唔會有好消息帶畀大家呢?
峰:係呀陸叔,舊年庚子年真係唔好過,不過新一年,整個流年世運會有好轉。我會用幾個值得參考嘅資訊,同大家分享我嘅睇法。好似庚子年通勝中《地母經》嘅詩文,其中一句『太歲庚子年,人民多暴卒』,應驗咗新冠疫情令全球死傷無數。辛丑年《地母經》詩文,明顯比上年好,『太歲辛丑年,疾病稍紛紛。吳越桑麻好,荊楚米麥臻……人民漸蘇息,六畜瘴逡巡』。如單看字面解釋,疫情明顯有所減退,社會經濟會慢慢復甦。
陸:如果按照你所講,今年個象唔錯喎,聽完都好似打咗支強心針。

從事金融業的玄學名家羅奇峰。

 


峰:或者咁講,同舊年比較,的確係好咗,但要留意係始終大病初癒,唔會一下子返到之前歌舞昇平嘅光景。我再用今年《皇極驚世》年值卦去睇,今年卦為『山火賁』,賁者,主外表裝飾化妝,內裏仍係虛嘅。另外,『賁者,主亨,小利有攸往』,意思即小事可成,大事仍未得,所以我會認為今年係慢慢復修年。但點都好,比起舊年『地火明夷』卦(主太陽藏在地之下,世代一片黑暗),已經係一個好好嘅轉變。
陸:世界大局睇落已算唔錯,咁我哋香港會唔會食正呢個復甦大浪,今年會吉星高照?
峰:如果睇香港運程,好多會用立春八字去睇,但我會參考埋香港九七年嘅回歸八字一併參考。簡單嚟講,香港本體係一棵參天巨木(甲木),卻出生於炎熱嘅夏天,要用水去調節,既可用水去解火之熱,又可生旺木。不過今年係辛丑年,地支丑為土,出現子丑合化土之象,令香港用神受制,加上香港流年犯太歲,似乎單從流年結構來看,香港今年仍難全面復甦。不過如果睇長啲,之後流年都會唔錯,今年我反而當係落力播種嘅一年。
陸:香港人慣咗逆境自強,今年攞唔到一百分,就攞住七十分先,最起碼見到曙光。咁大家最關心嘅股市,今年又可否承接去年強勢,繼續牛氣沖天?
峰:以目前的客觀形勢,尤其是美國瘋狂印鈔,我估計美股走勢仍然續強,而港股受惠於內地北水大舉南下,仍可望火乘風勢。不過,正如我上面所講出現『水被土制』局面,而水亦代表流動性,我會預計今年港股突破後,會有因資金流走令股市出現震盪(我估計係夏天時間)。其實今年《地母經》卜文最後幾句係『辛丑牛為首,高低甚可憐。人民留一半,快活好桑田』,我會理解為今年即使股市向好,要懂得適當時候收割,保留實力等另一次機會。