為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 02 月 11 日

打疫苗行動公僕抽生死籤入伍

政府早前聲稱,預計農曆新年後便可以展開新冠疫苗接種計劃,亦喺二月初已發信各政府部門,說明相關社區疫苗接種中心的運作細節,以及如何按部門人手比例,抽調公僕去參與,本周一就係交人頭嘅死線。
有知情人士向本刊透露,呢次行動一做就起碼一個月,成個接種計劃亦會持續半年,好多公務員收到自願參加嘅報名表時,睇見時間長津貼少,反應都係一般,會第一時間報名嘅,都係正在博上位嘅人,但都係遠唔及目標人數,所以各部門要各施各法,湊人頭交畀政府。

政府向各部門要求交人,協助營運社區疫苗接種中心。

 


話說各大紀律部隊最快達標,警隊計過數,只要抽調文職人員去幫拖已夠數;消防處為咗對日常運作影響減到最小,就要各職級及部門平均分配名額,仲講明萬一發生重大事故,就要召喚休假人員即刻返工。
其他部門好多左度右度都計唔掂,有傳房署甚至一度扭計想唔交人;有話機電署同地政總署覺得好多崗位嘅人一調出去就成個月,跟開嘅工作好難搵其他人接手,但又唔可以唔交人,最終決定抽生死籤,由個天決定邊個「入伍」。
香港公務員總工會主席馮傳宗說,得知有啲部門好積極報名,有啲就相對冷淡,佢上周曾向公務員事務局反映不少部門抽調人手有難度問題,建議不如讓反應好嘅部門組多幾隊,人手緊張嘅就准佢哋減少交人。
根據政府內部通訊,每間社區疫苗接種中心將會運作最少半年,每周開放七日,每日朝八晚八,除打針工作外,整間中心的運作會由兩組公僕輪流負責,每組二十六人,包括一名中心主管、兩名中心助理主管、二十二名登記員及一名雜工,每人每周工作四十四小時。
不同規模部門各有「交人」指標,警務處、康文署等七個編制超過七千人嘅部門,須要交三組人手,即七十八人;其次係社署、水務署等七個編制超過三千人嘅就交兩組;勞工處、運輸署等十一個只有一千五百人,就交一組;海事處等四個部門只有一千多人,要交半組人;其餘不足一千人部門,都要交百分之一嘅人出來幫手。

政府之前搞全民自願檢測計劃,曾以高額津貼吸引不少公務員參與檢測中心工作。

 

新冠疫苗即將抵港,政府正密鑼緊鼓籌備,預計農曆新年後隨時啟動接種計劃。