為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2021 年 02 月 10 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

疫情年的樓市

香港在疫情影響下,眾多行業都深受影響,但住宅樓市就大致企穩。根據差餉物業估價署最新公布數據,上年全年私人住宅售價指數微升百分之○點○二。事實上,政府拒絕減辣或撤辣係控制投資需求,但供應方面一直追唔上,住宅價格仍然居高不下。除此以外,私宅樓市企穩仲有咩其他因素?上星期我就請咗中原地產亞太區副主席兼住宅部總裁陳永傑(Louis)上節目傾下疫情年嘅樓市概況。
首先,持續量化寬鬆令市民手頭現金不斷貶值,與其放喺銀行冇息收,不如用作投資。Louis解釋,物業能夠跑出,第一係自住嘅剛性需求依然強勁,再者置業後租出賺取穩定收入亦不失為一個理想選項,抗貶值令樓市得到有力支撐。
低息環境持續多時,對供樓壓力或多或少有紓緩作用。以銀行同業拆息(HIBOR)計算嘅H按實際息率,回落至上年底嘅一點五五厘,按揭息口持續徘徊於十年低位,美國聯儲局更表明維持現利率不變至二○二三年,令供樓成本減低,有助入市意欲,使上年樓價大致橫行。

中原地產陳永傑(左)指居家避疫促使住宅用家換大換新。

 

 

另一方面,市民自上年以來宅家時間大增,更加意識到居住空間嘅重要性。疫情中見到部分舊樓因本身設計問題而較易傳播病毒,有意入市者較以往更重視單位質素,例如簇新程度、景觀、坐向及裝修等,資金許可下有用家「換大」「換新」。Louis觀察到有買家購入五千萬元(港元,下同)甚至一億元嘅大單位自住,而非炒賣,可見住宅物業除抗貶值外更增加避疫功能。
踏入二○二一年,新盤市場方面見到發展商加快推盤步伐,一月錄得逾一千四百宗新盤成交,按月急升約一倍半。同時,十大屋苑錄三百七十單買賣,比十二月升近三成,更創下近六年半新高。無論一手定二手,交投量都咁充足,對地產代理當然係好消息。中原住宅部上月佣金達三億五千六百萬元,Louis指數字按月升三成六,屬七個月以來新高。樓市小陽春比佢預期中提早來臨,如勢頭繼續暢旺,估計二月一手成交可高達二千宗。Louis仲留意到,樓價呈現逐月攀升趨勢,期望今年全年樓價可以升至少百分之五,景氣的話甚至可現百分之十五升幅。
長遠而言,雖然疫情仍會構成高度不確定性,但疫苗採購漸見進展,預料首批次將於本月底供港,相信待市民開始接種,疫情可進一步受控,買家入市信心有望回升。最重要嘅推動力係中港恢復通關,樓市可更見活躍。睇埋國際層面,美國政府剛換屆,外界預計新上任班子將採取較溫和嘅對外經濟政策,中美關係有望緩和,亦有助樓市復甦。
當然,準買家亦要注意風險因素,好似離港人士賣樓和失業率高企都會對樓市帶來隱憂,大家要計算清楚對樓價回調嘅承受能力。最後,農曆年前同各位拜個早年。祝大家大賺金牛、家宅平安!