為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2021 年 02 月 09 日

教主物語 蔡一傑

人生,充滿未知數,無窮無盡的變化,才能凸顯當中精采之處。
入行三十六年的蔡一傑,早已在五光十色的舞台,跳出其絢爛天地,怎料到去年他來一個華麗轉身,跳入YouTube,開設其個人頻道《傑少煮意》,一年下來已吸得過十萬人訂閱及千萬點擊率,榮升「教煮」行列。
彈跳於激光中的他,在廚房的舞步也絕不欺場,基本功扎實。「因為我細個會睇住媽咪煮餸,咁就吸收咗佢俾我嘅興趣。由以前細細個喺廚房幫手,到o依家自己煮,過年最高峰時期,要煮俾廿八個人食!」
投身YouTube,跟網友零距離接觸,蔡一傑樂在其中,但他也有被鍵盤戰士攻擊的時候。「有啲網友以為我玩玩吓,開頭留言就留埋啲衰嘢,但佢哋見我做咗成一年,o依家都冇嘞。我開呢個Channel,唔係玩玩吓、Hea做o架,除咗煮餸,我仲想教埋網友,男人嘅護膚、化妝、着衫⋯⋯全部係我傑少嘅主意,唔係『煮意』咁簡單!」
在未知數中隨心起舞,蔡一傑做到了,你還在等甚麼?

 

 

 

 

九歲人生

由舞台走到YouTube平台,蔡一傑的起步點,只是「玩吓」兩個字。「係無心插柳嘅,一九年做冬嘅時候,我上網搵靈感,睇咗好多唔同人教煮食嘅片,於是我就諗,自己可唔可以玩吓?
「跟住就拍咗第一條片,因為過年,我就整咗白切雞,剪完覺得Ok喎,放咗上網,反應又Ok喎,咁就開始同人分享我嘅煮餸心得。啲人睇完白切雞條片,以為我請槍,我就拍多一條片,再斬一隻,擺得番成隻雞出嚟。」
從其「教煮」短片中,不難看出五十三歲的蔡一傑,內功深厚,原來其「煮齡」已有四十四年之久。「我記得,我九歲就識用個火水爐炒雞蛋炒飯。喺我哋嘅年代,九歲已經識做好多嘢,唔使大人理我哋,我仲要理埋我個妹添!我九歲,我個妹七歲,我要帶佢返學、放學、過馬路⋯⋯o依家啲家長梗係覺得:『嘩!有有搞錯呀?九歲俾佢做呢啲嘢!』,但係我九歲就係要做呢啲嘢o架嘞!我唔覺得有啲咩稀奇,因為已經習慣。
「唔好話細個,就算o依家煮餸,彈油一定有o架嘞!不過我又唔怕嘅,我細個好似野孩子咁通山走,生火、煨番薯,點會怕俾油彈吖?」
童年的回憶,蔡一傑也有放盡其頻道中,「刴肉餅、榨菜蒸牛肉,都係我嘅童年回憶嚟,因為細個幫媽媽醃牛肉,都不下數十次,點樣做、份量幾多,都已經係慣常嘅事。」

縱然有指當YouTuber可掘金,但蔡一傑揼本經營頻道,試過買五斤重的龍蝦,示範煮龍蝦伊麵,他豪言:「賺番嚟嘅錢,都唔夠我買餸啦!」。

 

比相中的蔡一傑的年紀更小時,他已懂得用火水爐煮食。

 

把昔日招呼至親好友的菜式,於網上公諸同好,臨近聖誕時,他還召集好友小儀、伍詠薇、周汶錡及蝦頭(左至右)開派對,增添節日氣氛。