抵食靚牛
每次出街食飯飲嘢，大家嘅首選都會係中環蘭桂坊、蘇豪、尖沙咀諾士佛臺等等，灣仔往往變成第二選擇。其實灣仔三里屯都係一個唔錯嘅地方，呢度旺中帶靜，絕對可以媲美中環、尖沙咀。今晚我就揀咗三里屯嘅Mr. Steak，搵埋Mr. Steak老闆鄺生（John）同我哋講吓牛扒點樣食先叫最正！我仲搵咗08年中華小姐冠軍朱璇、季軍徐萌，一齊試吓全港只此一家嘅In-house Dry Aged牛扒。
飯局金句：Steak is Fashion.
5 |
本地高檔扒房一向都由外國品牌主導，但自從Mr. Steak嘅出現，就證明香港人一樣可以有自己品牌嘅高級扒房，老闆鄺生一開始就有全盤計劃，由裝修、出品到品牌Logo都花盡心思。今晚我就同08年度中華小姐冠軍朱璇、季軍徐萌，一齊去到三里屯嘅Mr. Steak試吓呢度嘅牛扒。 |
五星級牛扒
灣仔嘅三里屯，雖然位於商業大廈之間，但旺中帶靜，有一種好悠閒嘅氣氛。呢度有各式各樣的食肆同酒吧，大多數都有露天座位，好有外國feel。夜晚食完飯，又可以行出海旁吹吓風、睇夜景，佔盡地利。Mr. Steak嘅老闆John專登將餐廳布置成經典嘅美式扒房一樣，入面仲放咗好多John多年嚟收集返嚟嘅懷舊雜誌內頁作為裝飾，成個氣氛好似時光倒流一樣。
「我本身係做開鮮牛肉供應生意，但係見高級靚牛肉唔係個個都食到，又或者係認識得到，於是決定開餐廳，將高檔次牛肉飲食文化普及。」John原來已經做咗40幾年牛肉進口生意，供應優質牛肉畀五星級酒店，佢話呢間餐廳因為直接由母公司入貨，所以能夠用較大眾化嘅價錢，賣酒店質素嘅牛肉。既然係咁，酒店咪會畀佢搶咗好多客仔？John就話大家其實各有各做，「酒店畀嘅係一種高雅嘅用餐經驗，但係我哋係較casual嘅感覺，大家定位唔同。」John以前喺安蘭街嘅LAN'S STEAK，都試過提供好高級嘅用餐服務，但最後都決定放棄，「我哋都試過好似酒店嘅高級扒房，畀十把刀客人揀，頭幾次客人可能會覺得好新鮮，但三、四次之後，啲客就會話：『唔好咁煩啦。』於是我明白到，都係做番啲自己覺得舒服嘅嘢較為適合。」
Steak is Fashion
 |
兩位靚女向John請教煮牛扒嘅心得，John就話只要塊牛扒靚，西冷、肉眼或者牛柳呢啲部分，簡單地煎到半生熟，就已經好好味。 |
 |
 |
平時紅酒配牛扒嘅John，今晚就同我食牛扒、歎威士忌，佢一試呢個配搭就話：「Paco，我真係識你識得遲呀！」哈哈哈！ |
經常參加牛展，「閱牛無數」嘅John話佢一睇就知係咪靚牛，「隻牛睇落精靈啲，就代表隻牛健康啲、啲肉質都好啲。」 |
要搵到自己覺得適合嘅嘢，當然唔少得將眼界擴闊，留意最新嘅潮流，做咗咁多年肉食生意嘅John，經常會周圍飛搵靚食材，引入新品種，佢話：「牛扒其實好似Fashion，外國不時會有新出品，而我就好似一個記者，負責將佢哋帶返嚟，介紹畀大家。」美國嘅黑毛豬、美國Dry Aged牛肉、日本和牛等等，都係由佢哋公司引入香港。
好似呢間Mr. Steak，就係全港唯一提供In-house Dry Aged（D.A.）牛扒嘅餐廳。D.A.牛扒其實喺外國好普遍，因為一般家庭唔會有雪房，於是佢哋就諗到將塊新鮮牛肉吊起，利用空氣抽乾入面嘅水分，「製作D.A.牛扒就似中國人煲湯，煲得愈耐就愈濃味，D.A.牛扒入面嘅水分愈少，肉味就愈濃，肉質更鬆化。」 John仲話一般D.A.牛扒都經過21日嘅吊乾程序，大廚會每日嚴格控制房間溫度喺0-4度之間，濕度維持喺70度左右。
John最近仲有個新構思，就係畀顧客親眼目睹D.A.牛扒嘅製作過程，「我將會喺新店內整一間玻璃房，用嚟展示D.A.牛扒嘅製作過程，顧客可以走入去，睇吓D.A.牛扒係點做。」原來John打算喺五月將三里屯嘅餐廳移師去銅鑼灣嘅食街。兩位中華小姐朱璇同徐萌，一路食一路好專心咁聽John講解D.A.牛扒，知道有得親眼睇吓點樣製作，即刻話到時記得約埋佢哋一齊再食過。
食牛扒＝食生蠔
 |
好多女仔都唔鍾意食肉，估唔到佢哋經常搵好食嘅牛扒，咁我今晚一定冇介紹錯啦！ |
 |
 |
朱璇喺法國生活咗好耐，起初好唔習慣呢度急促嘅節奏，但哝家已經完全適應晒香港嘅生活。 |
啱啱嚟香港發展嘅徐萌，話好希望有一日有公司睇中佢把靚聲，然後喺樂壇發展，哈哈哈！ |
飲完干邑龍蝦湯，終於到今晚嘅主角出場，John特別安排咗一碟有齊日本和牛、美國D.A.牛扒同澳洲羊扒嘅tasting dish畀我哋試吓。朱璇同徐萌一見到就忍唔住「嘩」咗一聲，原來佢哋好鍾意食肉㗎，見到有咁多款式，開心到嘩一聲。朱璇問John應該食邊款先，John就話：「食牛扒就好似食生蠔，可以由淡味開始。」我就唔理咁多，第一時間試吓最貴嘅日本和牛，之後再試D.A.牛扒，和牛雖然肉味無D.A.咁重，但肉質的確好嫩滑。兩位靚女食完後都大讚好味。
同John傾咗咁耐，我就同兩位靚女傾吓偈。朱璇同徐萌係08年度中華小姐嘅冠軍同季軍，哝家喺TVB8主持節目。雖然佢哋啱啱喺香港發展，但係已經喺唔同範疇作出嘗試，仲有唔錯嘅成績。我知道朱璇當選後，好快就拍咗一部電影，「我接拍了楊凡導演的電影，還跟范植偉合作。我向來都很想拍電影，想不到那麼快就夢想成真，真的很開心。」
至於徐萌就喺上年參加咗一個韓國歌唱比賽，仲攞咗冠軍。「公司知道我很喜歡唱歌，於是就安排我參加比賽，我覺得很幸運啊！」雖然佢好謙虛咁話，能夠勝出可能因為表現比較穩定，但係可以贏到冠軍，佢嘅實力都唔可以忽視。
飯局嚟到尾聲，我哋就向John舉杯，多謝佢今晚教咗我哋好多關於牛扒嘅知識，我好期待新店嘅Dry Aged玻璃房，將來一定會去參觀。
 |
Mr. Steak |
