為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 02 月 04 日

反制英國BNO新政 中央留有幾手牌

中央宣布唔再承認BNO護照為有效旅遊證件,反制英國藉住「5+1」方案搶人兼搶錢。中方下一步會唔會再加辣招,還是留有餘地?掀起一番政圈熱話。
有資深人大政協直言,唔承認BNO為旅行證件只係第一招,仲有其他更重手嘅反制辣招,包括要求出任公職人士不能持有BNO;再辣一點,唔排除會撤消BNO人士嘅中國國籍及香港永久居民身份,變相失去選舉投票權。但最終會否打出呢兩張牌,要視乎中英雙方嘅談判氣氛,直言「英國佬唔似特朗普咁偏激,彼此可以埋枱傾。」
中央拒絕承認BNO,聽落只係打擊本護照喺國際上嘅認可度,對同時拎住特區護照嘅大部分港人,實際影響唔大,令外界推測阿爺實際發火力度一定不至於此。有了解中央思路嘅人大政協透露,中央心目中確有數張牌,接下來最大機會亮出嘅一張,係謝絕持有BNO人士出任公職,或要求現有公職人員申報有冇持有BNO。

英國炮製5+1入籍方案對港人吸引力有幾大,目前仍是未知之數。

 

BNO簽證居留政策,引爆一場中英外交風波。

 


特區政府無法掌握有關申請BNO嘅數據同資料,要靠個人主動申報,畀人話「你唔申報都無人知」,不過知情人士點出箇中玄機話:「英方掌握晒持有BNO人士嘅名單,若然有人暗啞底通水畀中方,就真係連護照持有人都唔會知發生咩事。所以相信屆時真係有心出任公職嘅人,都會自動放棄BNO。」
有外媒報道英國嘅BNO計劃可以吸引六千億港元嘅資金,足以掏空香港嘅中產層。據知有關方面曾評估,預算約三、四十萬港人離開。有政圈中人分析,真係有咁數十萬人申請BNO移民嘅話,只會令「黃營」流失票源,變相令建制派增加更多「鐵票」。
此外,有接近政府消息人士透露,當局正研究日後市民為特區護照續期時,入境處會審視其出入境記錄,若發現當中有一段長時間曾離開香港,處方可能要求出示佢入境當地嘅旅遊證件,若無法出示,唔排除會拒絕批出其特區護照嘅續期申請,若發現是以BNO護照作入境,甚至會取消其特區護照。

有分析指,除非英國未來有更強烈嘅挑釁舉動,否則中方未必再使出反制措施。