主頁 > 時事 > 時事速報 > 代子兼父職照顧鐵窗外的孩子嫲嫲：「要一齊等阿仔出番嚟！」 2021 年 02 月 02 日

代子兼父職照顧鐵窗外的孩子嫲嫲：「要一齊等阿仔出番嚟！」

統計，香港現時有近七千名在囚人士，而在鐵窗之外，他們的子女往往要交由伴侶或高堂照顧，就如今期的主角嫲嫲阿蓮（化名），過去八年一直獨力撫養孫兒，只為有日三代能夠重聚，迎接雨後陽光。

八年前的阿蓮，親歷兒子阿良（化名）被捕，最終被判入獄十一年，聞判一刻，她當場目定口呆，至今憶起仍不禁流淚，「心諗點解會咁，係唔係個天玩我？個仔入獄會唔會捱唔住？」除了養兒一百歲之憂，阿蓮更擔心的是兩歲孫兒善仔（化名），「我知道我一定要代個仔照顧個孫。」她續說。

八年前阿蓮（化名）的兒子入獄，遺下兩歲的孫兒交給她照顧，惟眼見孫兒近年開始傾向以暴力解決問題，令她心感痛心，決意求助。

愁困自責死胡同

自那一刻起，阿蓮身兼嫲嫲與父親之職，決定撫養善仔成人，「唔求個孫將來有咩成就，只望佢做個健健康康、心地善良嘅人。」然而，這個簡單的願望，實現起來一點也不容易，「同丈夫、大仔同個孫一齊住，空間細，家庭磨擦自然多，丈夫成日一發脾氣就動粗，點知久而久之，個孫有樣學樣。」阿蓮緊握手中濕掉的紙巾說。
阿蓮與善仔活在這樣的家庭環境下，既承受龐大的心理壓力，她更痛心現年十歲的善仔愈來愈不講理，「叫佢停玩手機，佢唔聽，一手攞起個杯就扔落地，扔幾次後仲扔埋嚟我度。對唔住都無講句，那一刻好心痛。」
八年來，阿蓮一直活在重重的自責之中，「我每日都等個孫瞓，佢試過廿四小時打機唔瞓，我就陪佢，天氣凍每晚我都半夜幫佢蓋被，咁多年都無試過一覺瞓天光。見到善仔咁，我都會諗係唔係我做錯咗，寵壞個孫？」
這些照顧者的壓力與辛酸，阿蓮坦言無人可傾訴，但感恩身在獄中的兒子阿良一直記掛着這兩嫲孫，「我堅持每星期都帶善仔去探個仔，個仔知道善仔嘅問題，都好傷心，但隔住塊玻璃，佢都唔知可以點教好個仔。」直至一九年十二月，阿蓮突然收到香港善導會社工黃文珊的來電，「佢話阿仔寫咗封信畀佢，想佢幫吓我哋。」
正因如此，阿蓮認識到由香港善導會與香港小童群益會合作推行的「藍巴士賽馬會結伴成長計劃」，計劃由香港賽馬會慈善信託基金捐助，旨在透過不同的介入方式，為在囚家長的十八歲以下子女及其照顧者，提供各方面的支援，促進家庭關係。「第一次家訪，除了了解善仔有紀律問題，亦留意到阿蓮承受好大情緒壓力。」黃姑娘憶述。

黃姑娘指計劃亦有義務導師為孩子提供各類型體驗活動，例如特色小食製作，與他們結伴成長。

重拾快樂曙光

透過遊戲，黃姑娘逐步與善仔建立關係，同時讓他慢慢學習紀律，與此同時，亦鼓勵兩嫲孫參與不同的戶外活動，改善關係，「我亦會同阿蓮傾偈，嘗試疏理佢積壓多年嘅情緒，同壓力來源。每次見完面，我都會寫信畀阿良講佢哋嘅情況。」而令她難以置信的，是每次阿良都會親筆寫長達八、九頁的回信，「佢會同我講屋企人嘅成長背景，分析番點解情況會咁差，亦會向我提建議，睇得出佢好疼錫屋企人，即使在囚都想盡力幫佢哋。」
經過黃姑娘的循循善誘，阿蓮喜見善仔的脾氣大有改善，然而去年疫症來襲，全港停課，一家四口困在家中，又令情況惡化，「善仔唔肯上網課，又掛住打機，講唔聽試過郁手打我。我無辦法唯有打畀黃姑娘。」說罷，身旁的黃姑娘即續道：「去年六、七月，幾乎每日都收到阿蓮電話，有時仲要即時上門處理善仔嘅情況。」
在丈夫暴力行為的影響下，眼見善仔情況突然轉壞，黃姑娘一度提議阿蓮帶善仔另覓住處，而最終一句話令她鼓起勇氣，「黃姑娘叫我唔好畀自己繼續鑽入死胡同。為個孫所以決定搬。」最近，阿蓮更聽從黃姑娘的建議，將善仔送到寄宿學校一年，讓他好好學習紀律。「不過，阿良起初都唔同意，覺得咁做離棄咗個仔。」黃姑娘說。
直至去年十二月，阿良寫了兩頁紙的信給兒子，剖白送他入寄宿學校的原因，「個仔話無諗過唔要善仔，而係想佢學好。善仔睇完話爸爸一定一路寫一路喊，因為佢都想喊。」阿蓮指，如今每晚都收到善仔的溫馨來電，「佢同我講對唔住，話以前對嫲嫲做咗好多錯事，仲話好掛住我，未試過咁耐見我唔到，好想攬住我同爸爸。」電話裏，善仔的一言一語都充滿了愛，令阿蓮突然想起八年前的心願，「好開心見到善仔慢慢學好。」
如今，阿蓮亦聽從黃姑娘的建議，打算找工作幫補家計，同時建立個人興趣，學習放下壓力，享受活着的每一天，「好耐無試過瞓天光，希望幾年後個仔出番嚟，可以一家團聚，到時我就功成身退喇！」她笑說。

全方位支援

黃姑娘指，計劃同時為在囚家長提供遙距親職輔導及情緒支援，亦會代買禮物跟其子女慶祝生日，「我哋亦有師友計劃、互助小組、家務指導、託管、義工陪探監等唔同活動和服務，為受助家庭提供多方面嘅支援。」
香港賽馬會慈善事務部主管應鳳秀表示：「在囚人士與其子女在維繫關係上面對獨特挑戰，其需要卻往往被忽略，馬會希望透過計劃助他們克服成長過程中的困境，拉近兩者的距離，建立良好的家庭關係，讓子女茁壯成長。」