抗疫前線

上一期我由疫情講到藥物和保健，事實上抗疫路上環環緊扣，所有出力嘅專家、工作人員、政府、企業，以至市民嘅配合同樣重要。當中，檢測篩查可以話係抗疫工作最前線，亦係第一度防線，世衞在疫情初期曾向各國傳遞一個非常簡單嘅訊息，就係「檢測、檢測、檢測」。
當然，各國防疫抗疫方法不同，資源亦各異，但如單以檢測作比較，我見到Statista統計數字，全球受影響國家中檢測率最高係以色列（今年一月十八日止每百萬人口累計檢測約一百零三萬次），至於香港，截至一月十九日每百萬人累計檢測總數近八十六萬。
記得上年疫情最初爆發，本地檢測能力有限，有私院高價提供服務仍然大排長龍。到九月政府推普及檢測，當時我對於香港能否應付如此大量試驗都抱有疑問，記得我當年做一個化學實驗都要成堂至搞掂。最後普測完成一百七十八萬人測試，採樣人員固然要安排，實驗室和人手又如何籌備？我見到其中一間承辦商香港分子病理檢驗中心（HKMPDC），為迎接呢次大規模篩查，兩星期內在沙田完成一個核酸測試實驗室嘅設備配置，面積過萬呎，可以大大提高本身嘅檢測容量。
能夠迅速設立新實驗室，除咗有合作夥伴，仲有母公司凱普生物科技支持，包括提供自主發明新冠試劑盒，以及即時運來自家研發嘅核酸提取儀，可以喺十八分鐘完成一個樣本自動提取，加快檢測時間。凱普生物（300369）呢間公司非常低調，雖然在深圳創業板上市，但其實「出生」於香港，創立係由香港大學一項名為「導流雜交」專利技術（Flow-through hybridization）嘅轉移開始，凱普英文名Hybribio都係咁嚟，港大全資擁有嘅港大科橋亦係公司股東之一。我參加母校百年紀念活動時，都見到刊物上提及呢項非常成功嘅科技轉移案例。

流動採樣車能靈活調配，在近期突發強制檢測中發揮特殊功能。

凱普創辦人管喬中曾經講過，香港市場規模細，因此公司除在香港營運分子病理檢驗中心外，同時在內地建立大型廠房和實驗室。不過，香港喺公司嘅角色始終非常重要。由於香港質檢嚴謹，並由專業團隊帶領，嚴格按照國際管理和質檢制度，因此令公司全國設施都有香港學術界DNA。而一次新冠疫情，見到管喬中即時決定加入本地檢測戰線，開始時甚至冇計算成本是否能收回，可見佢對公司「原產地」嘅感情。
最近多幢大廈甚至小區要強制檢測，除咗社區檢測中心之外，我亦見到多個臨時採樣站，以及可更靈活調配嘅流動採樣車。新聞上見到車上有HKMPDC標誌，原來都係呢間公司提供服務。檢測用車在外國都有見到，因為外國人口較分散，本來我覺得喺香港採樣站已經算係方便，但今次見到圍封地區內確實難以即時設立採樣站，採樣車就能夠發揮特殊功能。而且在車上採樣較整潔衞生，亦設有廢物箱收集防護衣等已用物資，希望日後有更多採樣車投入服務。
我在港大時本科係化學，最近見到檢測和疫苗資訊提及大量化學名詞，都勾起幾十年前在實驗室嘅情境。期望有機會同管兄見面交流。