為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 01 月 29 日

千呼萬喚始封區 中央責成徹底追源

抗疫一年,香港未見起色,確診個案近日突破萬宗,政府更首度「封區」,局部封鎖佐敦「廟街疫區」指定區域兩日。可惜事先走漏風聲,嚇到至少三千名居民提早執拾細軟逃離疫區。有指部分南亞裔街坊走入元朗躲避,政府呢趟真係變相「擴疫」而唔係「抗疫」。
舊區劏房隱患處處,唔少專家幾個月前已提出警告,但政府一拖再拖,拖到佐敦疫情失控,先急急腳「封區」,受害商戶被迫停業但無錢賠,民怨自然高。
政府錯判疫情已經唔係第一次。據了解政務司司長張建宗去年十二月尾帶隊北上深圳,會見國家衞健委官員,外界以為佢趁機吸取抗疫秘笈,而一眾官員則集中向阿爺解釋香港點解做唔到全民檢測,其實衞健委官員既關注點早已不在此,而係提醒要徹底追查病毒源頭,不放過每一個感染個案,做到決心「清零」,咁香港同內地先有望通關。對中央嚟講,疫情一日清唔到零,講乜都嘥氣。

被中央責成要追尋源頭後,張建宗(右二)帶隊巡視佐敦疫區,陳肇始(左)同徐英偉(右一)就做左右護法伴住。

 

佐敦出現小型爆發逾三星期,港府才史無前例採取「封區」措施。

 


本港經歷四波疫情,雖然「限聚令」雷厲風行,但社區播毒未停過,源頭不明嘅個案更加係日日新鮮,但港府從來唔去追本溯源,每天交代疫情進展,追不到源頭的就只以一句「源頭不明」草草帶過。衞健委官員明確點出「追源頭」嘅逼切性,認真係當頭棒喝。
佐敦首度「封區」,雖然最終只搵到十三名確診者,但正如抗疫專家袁國勇話齌,始終有開始好過無,及早堵截病源,總好過任由佢四散。有政壇高人就提議,班高官應該向新加坡學習。
事實上,新加坡早喺去年四月已將防疫施嚴格程度提升到最高級別,比香港行早好多。當局好快意識到喺人口密集嘅城市,病毒擴散會好大,採取嚴厲措施抗疫,包括以一個高度複雜嘅接觸者追蹤機制,去尋找每一個曾經與確診患者接觸嘅人,讓佢哋接受隔離或監測,所以佢哋係唔會出現「源頭不明」個案。
雖然新加坡曾出現單日確診過千嘅情況,但數字好快回落,政府五月中已逐漸放寬措施,並維持至今,呢家單日確診數只維持三十至四十宗,且死亡數字遠比香港低。相比之下,香港總是跟在疫情之後,鄰近地區有辦你睇都學唔到,真係唔知搞邊科。

新加坡設立嚴謹嘅接觸者追蹤機制,阻止疫情擴散。