跳槽未夠一年 李偉亮忽然劈炮

無綫新聞及資訊部高級監製李偉亮早前獲舊老細陳鐵彪挖角過檔Now新聞台，擔任助理總裁。估唔到佢做咗大半年，今個星期一突然傳出劈炮唔撈，仲要即日Last Day執包袱走人。新聞部好多中高層都唔知發生咩事，即刻四圍打探，有人話陳鐵彪上個星期對佢有份審核嘅節目《政情》表達咗一啲意見，當中多多少少係對李偉亮嘅表現感到不滿。
此外，有內部人士話，李偉亮為人好低調，低調到連開會都甚少出聲，加上平日無咩參與日常運作，又好少寫稿或改稿，確係畀人做事唔積極感覺。佢究竟係咪畀老細詐型兩句就唔撈，還是被迫起身，內部人士話不得而知，只肯定冇咗佢，影響唔大。

李偉亮去年獲陳鐵彪挖角，由無綫過檔Now。