為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 01 月 22 日

「12逃犯」案三大疑點 助偷渡中介有蠱惑

十二名香港逃犯去年八月企圖偷渡台灣一案,香港警方一直追查協助佢哋偷渡嘅幕後黑手,繼早前先拘九人,上星期再拉十一人。根據警方提供資料,呢二十人喺案中角色包括有中介人、安排行程、提供車船、窩藏,以及金錢資助等。
正當外界集中關注今次被捕嘅黃國桐律師涉嫌資助他人偷渡,同埋之前拉嘅梁國雄前議員助理、民運人士劉山青妻子唐婉清,涉嫌窩藏逃犯,有知情人士向本刊爆料,呢單案有三大疑點,令人費解十二逃犯為何會踏上呢隻偷渡艇,究竟佢哋真係覺得可以去到台灣,還是畀人呃去送死?

黃國桐涉嫌協助偷渡被拘捕,消息指他疑出錢資助逃犯着草。

 

十二逃犯家屬擔心他們在內地接受審訊會否不公平,卻從無質疑安排偷渡的人有問題。

 


疑點一係今次落網嘅人裏面,原來有三個係專門四出搵人去偷渡嘅中介人。罪犯四出搭路偷渡潛逃就聽得多,主動搵「客仔」去偷渡就真係聞所未聞。知情人士話,其中一名識得吓音樂嘅中介人,成日去警署門口等「手足」保釋,又或去法庭旁聽「手足」提堂,目的係兜搭涉案人,游說轉聘佢嘅律師團隊,話可以幫手申請「六一二基金」,代付律師費。知情人士透露,有人轉介客仔畀律師會有佣金收,得知有偷渡門路後,就撈埋偷渡中介。
「據知十二逃犯之中,有一個本身冇諗過要着草嘅青年,睇番佢單案亦唔係斷到正一正,點計都有得打,加上年紀輕,就算入罪相信也不會判得太重,找完數就可以重新做人,但着草就一世,冇理由要冒險坐快艇偷渡,攞條命去博啫。」知情人士續說:「但係青年就係畀呢位中介人不斷游說,講到佢實會畀法庭判重監,嚇到青年唔敢面對官司。中介人就話如果去到台灣就可以自由,青年一念之差就答應一走了之,搞到現時惹多幾條棄保潛逃同非法越境等罪名。」
第二個疑點,就係根據內地公安調查所得,被捕人士承認坐快艇由香港經東沙群島駛去到台南屏東,但係隻艇只有九米長,約兩米寬,單計油缸入面嘅燃油,已經唔夠駛咁長途,案發時更迫滿十二人嚴重超載,不但會更耗油,亦影響航行穩定性,增加翻艇風險。
疑點三係明知偷渡去咁遠,點解可以畀一個無船牌嘅人揸船呢?加埋艇上根本冇足夠救生裝備,一旦喺茫茫公海冇油失去動力,又或遇上大風浪,全船人隨時葬身大海都無人知。

艇上偷渡人士帶備有限糧水,一旦遇事即使無翻艇,也隨時因缺糧缺水致命。

 

內地公安發現十二逃犯所乘坐快艇,燃油存量根本不夠遠航至台南。