為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 01 月 15 日

換屆前被摷舊片爆料 律師會鬧抹黑戰疑雲

律師會理事換屆選舉本來仲有四個幾月先到,但隨着法律界立法會議員郭榮鏗被DQ,泛民認為有必要提早部署爭位戰。日前有媒體以「恐爆律師群組」為題,發布一條片段,企圖渲染香港律師會,引來法律界議論紛紛。
該片主角係一名月前不幸染疫嘅律師藍嘉妍,但內容重點唔係同情佢,反而係暗寸有人因為貪玩出席聚會而染病。確診肺炎唔係大新聞,但咁都畀人大肆狙擊,只因改選理事選舉將喺五月舉行,知情人士話,藍嘉妍被對手視為爭理事會席位嘅假想敵,唔排除有人藉抹黑她,變相為自己陣營加分。
片中內容提到藍嘉妍律師喺十一月二十六日確診,雖然感染源頭不明,但相關報道就巧妙地搬出佢喺染疫前,分別喺十月十八日同一眾律師好友聚會慶生,然後再喺十一月二十日參加黃大仙Band Stage嘅音樂聚會,但因為冇圖冇真相,該媒體就攞咗藍嘉妍喺半年前出席同一音樂活動嘅舊片嚟用,刻意堆砌藍嘉妍嘅貪玩形象,令人感覺佢係因為愛群聚而出事。

上屆理事會改選爆發激戰,「黃絲」陣型連贏四席。

 

理事會選舉臨近,染疫嘅「藍營」律師藍嘉妍疑遭對家大做文章,令她非常無奈。

 


今次疫情至今累計有超過九千人染疫,為何偏偏大肆報道藍嘉妍中招?知情人士話,不排除跟嚟緊嘅律師會理事選舉有關。獲立法會議員何君堯支持嘅藍嘉妍,一八年喺律師會理事改選中同張達明、林耀強鬥得難分難解,最終藍律師勝出,因而被泛民理事視為最強對手。五月改選在即,唔排除藍嘉妍再次尋求連任,因而觸動某些人嘅神經暗中發功,將藍嘉妍染疫消息有咁大「煲」咁大。
查實律師會理事嗰個位,喺法律界係兵家必爭之地。有律師會中人話,自從前法律界議員郭榮鏗被DQ後,泛民就法律議題嘅發聲平台又少一個,日前有資深人權律師關尚義因捲入泛民初選,被警方拘捕,令泛民意識到有必要加大力度,搶佔律師會呢個平台。
呢場改選亦被視為嚟緊立法會法律界選舉嘅前哨戰,消息人士話:「律師會選舉嘅選民人數超過萬二人,而立法會法律界選舉先得幾千人,相比之下,有心人用理事會選舉試水溫,有助測試仲有幾多選民會企喺佢哋嗰邊。」至於無端被人暗寸貪玩嘅藍嘉妍大呼冤柱:「 其實我只係一個普通女子,喜歡喺社交平台同朋友分享近況,但無諗過半年前嘅唱歌片,會畀人摷出嚟寫,仲要捲入理事改選嘅政治鬥爭中,真係好無奈。」

法治議題牽起不少爭議,香港律師會成為泛民急於搶佔嘅平台。