康宏又出唔到帳目 馬時亨轟誠信破產

本周一，康宏環球（1019）又再一次未能公布帳目，理由都係舊調重彈。管理層最新講法係估計今年一月底或之前完成並落實尚未完成經審核嘅帳目，然後等到明年二月底前召開股東年度大會。
記者問代表康宏深圳幫嘅馬時亨點睇？佢話一早講過康宏嘅公司管治「沒有最差，只有更差」，「十一月出公告話將會出到盤數，現時好明顯係誠信破產！」接近康宏消息人士更質疑康宏董事局一直「耍」小股東，「畀個希望股東，講到真嘅一樣，現在連帳目都無，叫人點信？」
康宏公布帳目歎慢板，搵自己人入董事局就夠晒快手。馬時亨去年九月開始一直爭取加入康宏董事會，「我同石禮謙就一直入唔到，佢哋今次就搵咗兩個獨立非執董同三個執董入去。」
對於康宏拒絕第二大股東郭曉群同自己等人入局，馬時亨歎道：「點解要咁驚？好似有人行近間公司，想了解內部多啲就好驚好多動作，點解嘅？」康宏本周四將舉行「未完的股東特別大會」，「上次話要抽籤，今次除咗時間地點就咩都唔知，問極都冇人覆，好似入咗黑洞。」

馬時亨轟康宏至今仍未出到一七至一九年年度帳目是誠信破產。

董事會主席陳志宏本月一日起調任為非執行董事，自去年九月起，陷入股東糾紛的康宏環球委任三名執董和兩名獨立非執董入局。