為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 01 月 07 日

揪出隱形患者 港大低成本驗污水見奇功

新冠肺炎疫情重創香港經濟,自視好打得嘅林鄭政府卻一味捱打,抗疫抗足一年依然老鼠拉龜。喺無法實施禁足令下,全民檢測推唔成;餘下招數得番「限聚令」一招,又搞到天怒人怨。
直至港大跨學科團隊日前宣布,佢哋能夠透過污水檢測搵到新冠病毒,及早揪出隱形患者,終於為抗疫帶來曙光。
污水追蹤新冠病毒,威力到底有幾大?睇番港大嘅研究結果,團隊連續多日喺牛池灣彩雲(二)進行污水病毒監測,發現本來無確診個案嘅豐澤樓,連續五日有四個樣本對新冠病毒呈陽性反應,懷疑大廈內有隱形患者,政府於是強制求全幢大廈居民做檢測,結果發現有三人確診。
立此奇功,港大跨學科團隊居功不少,三大猛將分別係土木工程系教授張彤,公共衞生學院教授潘烈文,以及港大醫學院院長梁卓偉。梁卓偉係流行病學及全球衞生權威,曾參與多次疫症嘅流行病學研究,包括○三年沙士、一三年嘅H7N9等。去年爆發新冠肺炎疫情,佢更獲邀加入政府嘅專家顧問團。

研究人員喺彩雲邨豐澤樓揪出隱形患者,結果發現有三人確診。

 

全民檢測喺香港無法推展,導致社區擴散一發不可收拾。

 

擅長流行病學研究嘅梁卓偉喺疫情下再次發功,引入先進嘅污水監測方法。

 


至於一向有做污水研究嘅張彤,跟世界不同實驗室有緊密聯繫,但講到監測新冠病毒,仲係新嘗試。話說早在去年二、三月疫情爆發初期,荷蘭、美國及瑞典等國家已有研究人員喺污水中檢測到新冠病毒蹤迹,梁卓偉和港大一班專家立即意識到,香港應該都可以做類似研究,於是搵埋張彤一齊試搞。
知情人士透露,研究過程並非一帆風順,「起初都擔心新冠病毒會否被污水稀釋,難以被檢測出來,亦憂慮準確度是否夠高,擔心一旦勞師動眾喺各區大廈做檢測,最終檢唔到嘢的話,就會惹人反感,所以初期只做小規模研究,唔敢大鑼大鼓。」
直至四月正式成立跨學科團隊後,先向食物及衞生局提交計劃申請書,申請研究資助,最終獲該局嘅醫療衞生研究基金撥款四百五十多萬元,相關研究計劃喺十月正式啟動,為期一年。
首次做呢類檢測,最大挑戰係乜?張彤接受本刊訪問,話今次採用嘅新污水檢測方法係經過不斷優化同驗證,並已喺第四波疫情期間開始做污水監測,「主要難度係香港人口稠密,污水管網複雜,要靠渠務專家幫手,先可以搵到準確位置採樣。」
透過檢測污水進行流行病學監測嘅方法,外國喺十幾年前已有人提出,好處係預警時間比臨牀檢測為早、監測規模大、覆蓋面廣,可以較低成本達到高效率,所以世界各地專家亦樂於應用喺處理公共衞生問題,最常見例子係監測污水中是否存有小兒麻痹症病毒。
污水監測病毒見奇功,引起坊間熱議是否可以用佢代替全民檢測?中大呼吸系統科講座教授許樹昌就話,污水檢測係一個有助搵出患者所在地區嘅方法,同全民檢測係兩回事。不過,亦有人話,驗污水可以搵隱形患者,就可以將抗疫行動由被動變成主動,唔使吓吓求人或強制市民去驗。

港大研發從污水中監測新冠病毒,為社區疫情提供預警訊號。

 

土木工程系教授張彤帶領跨學科團隊研究香港污水中新冠病毒嘅分析同監測方法。