娛樂新聞，重點是「娛樂」，夠娛樂性，C1不是夢。
近期最富娛樂性的C1，非前港姐冠軍陳曉華（Hera）、跟MIRROR成員陳卓賢（Ian）、還有其前男友狄以達的多角緋聞莫屬。事件由同車引伸至同居，但女主角隨即否認戀情，惟對「同車男」的身份，三緘其口，令事件更撲朔迷離。
談及愛情觀，下周才二十六歲的她，說得實際，「以前我會好憧憬拍拖嗰種感覺，覺得自己一個人好悶，o依家就覺得，我唔想因為鍾意拍拖嘅感覺而拍散拖。下一個同我拍拖嘅，會係同我結婚嗰個。」
短短兩個月就接二連三爆出緋聞，可見陳曉華桃花的旺盛；正面點看，也令事業才剛起步的她，打開更大的知名度，係冒險咗啲啫。
「我以前好容易發脾氣，o依家想做好自己先，到真係有一個人鍾意我，都係鍾意一個更好嘅我。」
其實，娛樂新聞，看過笑過食過花生便可。

 

當選翌年便於《謎網》中擔任要角，她表示當時自己猶如一張白紙。

13歲初戀

由十月初開始，陳曉華的緋聞就如三部曲，她的緋聞男友，由「首集」的何廣沛，到「第二集」的Ian，去到壓軸的，則是其舊愛狄以達。一聽到何廣沛的名字，她即爽朗地大笑，然後說：「梗係唔係啦！Friend嚟o架！（狄以達呢？）我哋仲係朋友嚟嘅，我同佢分咗手先決定去選港姐（佢好支持你喎。）係呀！我哋仲有啲共同朋友o架。」
至於被指同車兼同居的Ian，她只承認認識對方，駕駛其座駕，只因已買入對方的汽車。「我目前仍然係單身，專心工作好啲，唔會考慮其他嘢。」
對緋聞說得保留，但對於十三歲開始的初戀，陳曉華則侃侃而談得多。「啲人話初戀係好難忘嘅，我就忘記得七七八八。我Form 1鍾意呢個人，到Form 2、3先一齊，好puppy love嗰隻，連拖手都冇。當年我讀九龍真光，女校嚟嘅，但周圍有好多其他學校，朋友搭朋友就識到佢。我哋好似soulmate咁，冇乜身體接觸，見親面都係一大班friend出嚟，冇乜點獨處，但見到又會好開心。
「個男仔大我一年，喺我Form 5升Form 6嗰年，佢竟然話要分手！嗰時媽咪同爸爸都唔知我拍拖，到分手嘅時候，我先話俾佢哋知：『有個衰人蝦我呀！』。」
雖然緋聞鬧得熱烘烘，但陳曉華還以為其「Mr. Right」定下三大法則：「最緊要誠實囉！（你俾人呃過？）哈哈！唔係啦！我覺得一段關係，坦白係好緊要嘅。其次要孝順，如果佢好錫佢嘅媽咪，即係第日都會好錫我，我會加佢一百分！第三係要鍾意做運動，因為我好鍾意行山、玩獨木舟⋯⋯我希望佢可以陪我一齊去。」

本月中陳曉華忽然被爆撻着MIRROR成員陳卓賢（Ian），指二人同車兼同居，但她隨即否認，只表示買下男方座駕。

於中文大學攻讀護理系時，被譽為「中大校花」，但她自稱自己屬豪氣一族。