從揸飛機到揸巴士的啟示

這條片近日瘋傳，不少人看得熱淚盈眶。據說一名任職港龍航空十多年的機師，公司受到疫情重創要倒閉，佢毅然轉揸巴士，近日更將其心路歷程在facebook分享。
呢位網名叫Earnest Li的港龍前機師話，無諗過要出名，好多人想訪問佢都被佢拒絕了，只因為見到一些年輕同事無法走出困境，才決定將自己轉揸巴士的經歷公開，希望同路人早一些面對現實，開另一條生路畀自己。
飛機師和巴士司機，駕駛的雖然都係大型交通工具，一樣需要穿制服，不過一個上天一個落地。從片段所見，Earnest駕駛的路線行走地段十分繁忙，做飛機師基本上不用接觸太多人，起飛、落地前用英文講吓當地情況和天氣，有時說一兩句笑話；現在巴士司機日日跟大量乘客埋身接觸，說英文是不用了，聽粗口的機會更多，這種反差，不是人人適應得來。

 

Earnest自稱在港龍工作差不多十九年，但他很快接受現實，落地了，反而一些年輕同事仍未轉到心態，「不甘心too early to retire。」
Earnest話自己喜歡看名人傳記，特別是企業家和運動員的，最引人入勝的不是他們的成功，而是如何面對低谷，跌倒、再爬起來。
Earnest 的故事，其實早已發生在你我身邊。這一年，其實更準確地說是這兩年才對，香港先受反修例風波影響，旅遊、零售早已受創，再加一整年的疫情肆虐，已經五癆七傷。筆者認識唔少仍在盛年的高管都過不了這一浪，被公司辭退了，可是仔女仍在讀書呀，可以選擇的權利不多，有的轉做保險，有些去了做地產經紀，也有的拿出僅有積蓄來開舖，都係放手一搏。政府抗疫抗足成年都冇效，唔少領隊冇團帶去咗楂的士，做保安，也有職業運動員無得比賽去了送外賣。是很悲涼，也很無奈，更不甘心，不過馬死了，也只得落地行，有條路行好過冇。
二○二○是令人極度沮喪的一年，原來個世界可以差到咁，如果政府繼續以唔湯唔水的態度抗疫，相信苦日子還是會繼續，唯有面對現實，逆境自強。