為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 只能回味 2020 年 12 月 26 日

梁家權

資深新聞工作者。飲食文化著作有《尋找失落的菠蘿油》、《沒有粉絲的碗仔翅》、《食蛋撻的路線圖》、《麥芽糖的黐纏往事》、《苦路救星陳皮梅》、《當油炸鬼變成老油條》、《天橋底的牛丸》。

羊皮哪裏去了?

以往有一個不可理喻的想法,認為菜餚是即煮即食最好味,預製件和包裝的湯和餸菜,風味總遜一籌,但人總要向現實低頭,無時間無心情無精力便會貪方便,依賴得最多是罐頭西湯,反正金寶湯便宜得很,求其有一啖湯水暖肚,男人便別無所求。
十多年前已經有翻熱即飲的包裝老火湯,可能當時包裝技術未臻完善,總覺得「唔湯唔水」,但多年下來很多牌子似乎已找到最佳的烹調方法,令包裝老火湯比自己煲的更有味道,差別可能只在於自己煲會用更靚的料。
近年每天的工作不定時,很多時今天才知明天的日程,難以花時間打點材料煲湯,更遑論長時間睇火。實不相瞞,近一年飲包裝老火湯多了,好幾個品牌的出品都試過,味道都不俗,而且價錢相差無幾。以為自己是像精明的住家男人,除了好奇揀新口味外,會吼特價期入貨,尤其抗疫期不少品牌多次推出超級優惠,最近「寶湖廚莊」甚至推三百元六包抗疫價,一包夠兩個人飲的平均只是五十元,而且可揀不同口味,有湯有渣,養懶了人,當然也方便無時間煲湯的湯友。

 

 


上周末,帶寒意的天氣終於似冬天了,奈何禁堂食令下不能呼朋喚友打邊爐,唯有到九龍城李輝記排了四十五分鐘才買到一斤半牛頸脊,到元合買潮州牛丸和魚蛋,及到義香買豆腐卜。忽然有人說:「整個羊腩煲好喎!」
真的以為我好得閒,而且只餘半晝時間,根本想做也做不來,做得到也不夠入味,況且羊腩最好早一天炆好,過一夜更滋味,急就章即做沒有好結果。靈機一觸,記得見過「寶湖廚莊」有即食羊腩煲,有古法雙冬和川味兩種,試下又何妨!
想不到汁水很多,直情可以烚生菜,古法雙冬那款果然有不少冬筍和冬菰(見圖),更周到是有馬蹄,有枝竹,調味到家,羊腩件數不少,總體上不肥,明顯是腩排部位,很難想像排骨可以輕易咬碎,仔細咀嚼骨和肉都可以全數落肚,相信是高壓燜煮的結果,以味道和材料,配合價錢論,性價比極高。
不過,若要挑剔的話,想問羊皮哪裏去了?不敢貪心,若果有半數羊腩連皮,我會給一百零一分。