變革者新世界

新冠疫情去而復返，市民戴住Christmask過節已經係新常態，我都有做足防禦措施去行下商場，其中對尖沙咀K11 MUSEA嘅聖誕小鎮印象最深，好有節日氣氛。
K11生活品牌由新世界發展（0017）執行副主席兼行政總裁鄭志剛（Adrian）一手創立，以活現藝術作為品牌哲學，不僅將藝術引入商場咁簡單，而係將K11發展成購物藝術館。呢個理念唔止香港人buy，進入內地一樣受歡迎。按現時發展藍圖，到二○二五年，K11將會在十個城市營運三十六個項目，總樓面面積達二百八十萬平方米。
藝術購物可以精緻小巧，亦可以係大型項目，例如新世界一八年奪得航天城項目，剛在上月宣布命名為11 SKIES，將會集零售娛樂、醫養及金融服務於一身，成為三百八十萬平方呎嘅新地標。零售、餐飲、娛樂方面會有八百幾間店舖，超過一百二十種餐飲概念，一日試食一種都要四個月至試得勻。項目仲包括三幢甲級寫字樓，主力為金融及財富管理、健康醫養，以及香港、大灣區城市以至跨國企業提供創意工作空間。可以話，呢個項目將會成為一個完善嘅生態圈。

從K11口碑，以至大圍柏傲莊項目「疫市」熱銷，及荔枝角道888號甲級商廈拆售熱賣，我都感覺到市場buy-in公司新理念，Adrian亦幫新世界建立起獨特嘅市場優勢。

11 SKIES寫字樓部分第一期A預計於二二年首季落成，並已吸引多間財富管理及醫養業界優質租戶，包括中國銀行（香港）、花旗銀行、渣打銀行、富通保險及臻萃醫療等。租戶睇中航天城作為辦公地點，好處係方便將服務擴展至大灣區客戶。
Adrian鍾情藝術創意，亦喜歡向難度挑戰。今年十月，新世界宣布將北角皇都戲院復修活化，保留標誌性建築結構之外，更加希望透過軟件配合，重現五十年代輝煌，可謂「藝高人膽大」。皇都（前身璇宮）和我同年出生，有六十八年歷史，屬一級歷史建築。我中學時都有同太座（當時女友）去皇都拍拖睇戲，專揀特平嘅五點半公餘場，最有印象係睇《碧血長天》（The Longest Day）。除放電影外，亦曾有好多頂級藝術家和藝團喺呢度演出，本地和國際名家都有，大多數係香港首演。皇都重新上畫時，我一定同太座再去捧場，重訪昔日拍拖老地方。
公司推動匠心文化，幾年落嚟，從K11口碑，以至大圍柏傲莊項目「疫市」熱銷，及荔枝角道888號甲級商廈拆售熱賣，我都感覺到市場buy-in公司新理念，Adrian亦幫新世界建立起獨特嘅市場優勢。
不過喺氣候危機之下，市場亦好睇重企業對可持續發展責任嘅承擔。可持續發展需要「水利工程」，新世界發展喺一九年底同星展銀行完成一筆十億港元嘅可持續發展掛鈎貸款，最近更為貸款進行香港首筆同聯合國可持續發展目標掛鈎嘅利率掉期交易，以便對沖利率風險。根據呢項創新方案，假如新世界能成功創造至少八個「企業對企業」合作機會，幫助企業實現聯合國可持續發展目標，即可獲得星展贊助支援社會創新項目，其中包括初創加速器及夥伴計劃Impact Kommons。將創意融入綠色金融，並為社會孵化創新理念，再結合傳統行業，將可帶動變革，建立可持續發展「新世界」。