為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 12 月 17 日

CY翻Mark Simon電郵舊帳 揭肥佬黎泵水逾7千萬搞政治

傳媒創辦人黎智英早前被控詐騙罪,指佢違反地契條款把將軍澳工業邨駿盈街八號畀「力高顧問有限公司」,「力高」嘅神秘背景開始備受關注。呢間公司話就話係顧問公司,但根據全國政協副主席梁振英近日喺社交媒體發文,話佢翻查「壹傳媒股民」喺一四年披露嘅資料,發現「力高」背景殊不簡單,牽涉多筆政治捐獻。
資料顯示黎智英多次透過助手Mark Simon指示「力高」向公民黨、民主黨及外國勢力等捐錢,單係○六至一四年呢八年間,涉款高達七千六百六十多萬。
政治捐獻本來唔係新鮮事,奇就奇在黎智英似有求必應,只要政界好友開到聲,佢就嗱嗱臨「泵水」。當中包括前立法會議員涂謹申喺○八年向黎智英緊急索款五十萬元,聲稱急需錢為「民主阿伯」搞法律訴訟,大嗱嗱五十萬就馬上到手。
就連離開官場多時嘅前政務司司長陳方安生,黎智英一樣關照周到。話說陳方安生○九年六月某日,以其辦公室名義參與一個「長者之光」活動,開口問黎智英要求捐助,話咁易就獲對方答允,但黎智英要求以匿名作捐款,最後佢捐咗幾多,就未有進一步透露嘞。

黎智英透過Mark Simon向政黨及政治人物作多筆政治捐款。

 

作為黎智英助手嘅Mark Simon,多次指示「力高」向公民黨、民主黨及外國勢力提供政治獻金。

 

 

 


本刊曾獨家踢爆黎智英在港密會美國國防部前副部長PAUL WOLFOWITZ,以及由PAUL穿金引線帶肥佬黎去緬甸搞局,原來肥佬黎係呢個緬甸項目花咗五百幾萬之外,亦豪派咗七十八萬畀PAUL。
梁振英日前發表呢份八千幾字嘅帖文,掀起政界一片譁然,佢公開Mark Simon嘅電腦及電郵檔案,列出四十多項全部涉黎智英嘅政治捐款,尤其係「力高」嘅財務助理Linda Mendoza(又名Rosalinda Mendoza)更加係主力幫手「派出」。以政黨計,民主黨拎得最多錢,至少獲捐八百萬,公民黨都唔執輸,取到至少五百幾萬。
而個人獲捐名單中,陳日君收咗九百萬;陳方安生得到至少三百五十萬元;支聯會主席李卓人獲捐一百三十萬元;前立法會議員陳淑莊獲七十萬元,公民黨前立法會議員毛孟靜獲五十萬元;社民連前立法會議員「長毛」梁國雄獲五十萬;連民主黨創黨主席李柱銘亦榜上有名,獲得三十萬元。
李柱銘索捐理由係「緊急用途」,仲講明翌日急需呢筆錢,於是Mark Simon指示Rosalinda Mendoza若然無法搵到黎智英簽支票,就改從「公明織廠有限公司」嘅銀行戶口捐出,結果Rosalinda由「公明」嘅滙豐銀行戶口支付呢筆三十萬嘅緊急捐款。
黎智英對於宗教界人士一樣闊綽。話說佔中發起人之一嘅朱耀明牧師,就喺一三年獲得二十萬捐款。筆錢係捐畀由朱牧擔任主席嘅「香港公民教育基金會有限公司」,聲稱係用作支持「香港夢2013」。朱牧收到捐款後,仲親筆寫咗一張便條畀黎智英,話感謝對方嘅鼎力支持同慷慨捐助。

 

 

黎智英一四年喺公民黨黨慶前,捐出由丁維泉繪畫嘅名畫交予陳淑莊,並附上親筆簽名嘅捐贈信。

 

多筆捐款隱藏用途

黎智英捐出嘅政治獻金,很多時候係,隱藏收款人嘅身份同用途,只用「特別項目」作識別。好似佢早前透過Mark Simon捐畀陳淑莊、涂謹申同毛孟靜呢三筆合共一百五十萬元嘅捐獻,就只列明係「特別項目」。
咁都未算,一三年黎智英捐款予時任真普選聯盟主席嘅鄭宇碩及公民黨梁家傑嘅三十萬元,就列作係「特別項目」。同年十月黎捐助五百萬元畀民主黨,以及三百萬元予公民黨,兩筆加埋合共八百萬元嘅捐款,亦註明係用作「特別項目」。
此外,黎智英一三年十月捐助五十萬元予李卓人及五十萬元予梁國雄時,都提及捐款用作「特別項目」。到底何謂「特別項目」?點「特別」法?惹起人有無限聯想。

梁振英連發三帖狙擊黎智英。

 

力高財務助理Rosalinda Mendoza參與協助處理多筆政治捐獻金。

 

黎智英亦有向外國政要提供獻金,一三年經「力高」支付七萬五千美元予美國前助理國防部長Paul Wolfowitz,作為佢喺緬甸嘅服務。