催財秘方大公開

還有不足半個月，便踏入新的一年。在你的新年願望清單裏，除了「不用戴口罩出街」和「百病不侵」外，相信還會有「財源廣進」吧！
百業蕭條，能夠保就業，還有工返，原來已是簡單的幸福。
阿Bob（林盛斌）很貼心，特別分享個人的獨門催財秘方，公諸同好，希望大家都能盡快改善財運，過一個家肥屋潤的好時年。

 

秘方有九大要訣：

1. 請你馬上換一個長銀包。
2. 最好係要名牌，貴少少嘅。
3. 唔好用就咁對摺嗰啲銀包，要有扣或者有拉鍊嘅。
4. 將所有紙幣面值順序放好，兼同一方向排列。
5. 唔好放散紙神沙。
6. 唔好放任何單據，例如水電煤單、月結單。
7. 經常 keep 住有多少少錢喺銀包。
8. 經常保持你個銀包乾淨同整潔。
9.好好對待每一張放入你銀包嘅銀紙。

「大約八、九年前，我開始咗呢個習慣，我發現自己嘅財運真係有所提升。我嘅年收入，亦不知不覺間每年遞增30%。信不信由你，反正我信了，亦在實踐中。」阿Bob 實話實說。
他的財運，除了靠自身努力，還得歸功於陳定幫師傅的教路，建議他買一個長銀包。
陳定幫是融匯科學和玄學的師傅，他讀過一本書，叫《為什麼有錢人都用長皮夾？》，作者是日本稅務專家，多年觀察所得，所有賺錢的大老闆，全部都是用長銀包，而年收入都是銀包價值的至少200倍以上。

陳師傅將之改良，應用在催財風水學上，發現親友和客人都有顯著的財運增長。
「我見過好多富豪同上市公司主席，不論男女，佢哋全部都係用長銀包。」
他續分析說：「銀包就似一間屋，對待錢要等於對待人，愈住得舒服，自然會嗌多啲朋友來開party，變成錢搵錢。你愈愛錫錢，佢就會落地生根。
「我發現富豪放現金入銀包，是不會雜亂無章。一千蚊紙就好似將軍坐喺後面坐陣，散子例如$10、$20就放在前面。風水學好講道氣要順，銀紙放同一方向，分面額大細排好，財運自然好。」

點解不要放咁多購物優惠積分咭在銀包？原來是因為：「在理財角度，積分咭只會引誘你買嘢，容易令你使到好多無謂錢消費。」
正如放月結單在銀包，錢一賺來，又要交呢樣嗰樣，只會洩財運。

陳師傅建議選購長銀包時，顏色上最好避免火的系列，例如紅色、橙色、紫色，因為火合金，錢係金，「用紅色銀包唔係唔得，但係使錢會好快囉！」
當第一次用新銀包時，最好要放一大疊銀紙入去「開光」。「其實銀包都有類似嘅記憶，食大咗胃口，每一次都要食返咁多先得，意味住錢會越賺越多！」
話時話，你現在用的銀包，是長或短呢？