當年以「Angelababy師妹」之名加入演藝界的楊秀婷(前名：楊汀叮) ，跟隨師姐拍電影、廣告，可惜只是雷聲大，雨點小，未能帶來更多工作機會。至一四年，她和拍拖五年的演唱會製作公司高層Angus，在多倫多的百年古堡舉行百萬婚禮，正式收山做人妻。
自去年誕下女兒後，她的人生更添上無限色彩，每天都圍着女兒團團轉。昔日最愛花錢扮靚買衫的她，改為替女兒儲Hermès小手袋和金粒，「啲手袋仔實用又保值，將來可以留返俾個女。未來世界唔知會變成點，收藏嘅嘢有價值，有乜事都可以賣咗變番錢。」

楊秀婷自誕下女兒後開始儲Hermès mini，每個巿值十多萬至六十萬不等，「啲袋二手巿場有價有巿，我當投資，將來留晒俾女兒。」

收藏百萬Hermès

訪問當日的早上，楊秀婷先帶一歲多的女兒Valerie去上堂，安排了午餐後才接受訪問，之後再緊接約了另一家庭去玩，一天生活過得非常充實。
與母親穿上母女裝，一齊孭上Hermès手袋合照的Valerie，當價值幾十萬的名牌袋是玩具袋仔，開開閂閂。有女萬事足的楊秀婷笑說：「我每朝八點前就起身，o依家無乜機會化妝扮靚，通常早上帶囡囡去上堂，下午就去玩。我和老公是但一個一定會跟足全程，唔會假手於人，個女自小感受到父母既愛同家庭溫暖，將來人格都會好啲，自信心會強好多。」
楊秀婷自生下女兒後，生活即圍着女兒團團轉，連血拼都改為幫女兒買手袋和靚衫。這天，她帶了八個合共逾百萬元的手袋來拍照，當中最特別的是2000年全球限量版的Kelly Doll，是在佳士得拍賣會競投得來，約值六十萬。「呢個袋我之前影過相放上IG，成日有人傳訊息俾我，問我會唔會賣。我唔會賣！我會將Kelly Doll當家傳之寶，留番俾個女！
「大約五年前，我開始買Hermès，嗰時想買個可以見得人嘅靚袋，直至前年陀住個女時，就想買啲實用、保值嘅嘢，最好又唔會outdate，將來個女都用得到。樓又買唔到咁多，我年年有買金粒、金磚，放喺保險箱，我留意到Hermès手袋喺拍賣會個價年年係咁升，可以保值，於是就開始幫個女儲袋。」

Angus經常出國公幹，今年因疫情，生日難得可以一家三口齊齊慶祝。