為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 12 月 03 日

海洋公園海鮮舫合體 政府圖一石二鳥

停業多時嘅香港仔珍寶海鮮坊,近日宣布由海洋公園接收。「公園」加「海鮮坊」呢個世紀組合,聽落大纜都扯唔埋,何以會忽然「合體」?知情人士透露,喺三月初開始停業嘅香港仔珍寶海鮮坊雖然富有香港歷史特色,但畢竟「坊齡」長達四十幾年,船身維修費用不菲,有指大業主一直有意幫佢另覓「歸宿」,並睇中海洋公園發展潛力,示意捐出,政府又覺得有得搞,於是一拍即合。
知情人士仲話,政府呢次拍板將海洋公園同海鮮舫撮合,並非睇中海鮮舫嘅酒樓生意有可為,而係看中海鮮坊擁有海上地標呢個優勢。現時海洋公園管理層雖然有意大改革,但原有嘅法律條文寫得好死,樂園想話伸隻手出去發展海上範圍,亦掣肘多多。

跟海鮮坊合體後,海洋公園可望成為核心,形成海上路線,連接其他地區同島嶼。

 

今年三月初開始停業嘅香港仔珍寶海鮮坊,將由海洋公園接收,有望重生。

 


「一日唔修改法例,只單純整頓海洋公園,係好難有出路。如今將海鮮坊收歸旗下,變成『躍動港島南』發展項目嘅一部分,亦可以推動活化項目,到時政府想修例都出師有名,可以一石二鳥,既救海洋公園,亦可活化海鮮舫。」知情人士話呢番改動一旦落實,海洋公園好大機會變成核心,形成海上路線,連接其他地區同島嶼。
至於搞活化,係指海鮮坊單做酒樓外係唔夠吸引,商務及經濟發展局局長邱騰華亦賣晒關子,話海鮮舫唔會局限於酒樓角色,認為只要保養得宜,係有足夠空間舉行唔同活動,仲話稍後會邀請非牟利團體傾吓如何活化。
事實上,政府亦打晒開口牌,話有意連結南區獨特天然地貌、生態旅遊同歷史文化資源,三者混為一體以產生最大嘅協同效應。旅遊界立法會議員姚思榮話,政府決意想「拯救」獲注資繼續營運一年嘅海洋公園,呢次以帶動南區嘅具體旅遊規劃,比起單係用錢去拯救來得實際。
唔少人擔心將海鮮坊重生,只會加重海洋公園嘅財政壓力,令本來靠五十四億元撥款「吊命」一年嘅公園,使錢使得更加快。據了解,海洋公園一方亦不會有資金營運,傾向找外援,以合作方式經營海鮮舫,有人覺得,或者咁先可以將幾乎已經被人睇死嘅海洋公園同海鮮舫,嚟個終極大翻身。

姚思榮話,政府決意拯救海洋公園,將兩景點融合起來對區內有互相裨益作用。