為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2010 年 12 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

跨年Good Shows!

話咁快2010年只係尚餘兩周就完結,身為「金牌飯局」fans嘅你,一定知我最愛展望將來!2011年未到,我就誠邀喺2011踩入紅館《踢館》嘅詹Sir詹瑞文,率領佢兩位喺今周就開show嘅高徒翟凱泰(泰臣)同楊詩敏(蝦頭),同我一邊歎吓「帝苑廳」嘅特色宴會菜式,一邊暢談橫跨2010同2011嘅兩個good shows!

今次請得詹Sir(右二)同佢兩位高徒蝦頭(左)、泰臣(右)擔任飯局嘉賓,大談開show情況。

多造型unbelievable

上次同詹Sir喺「金牌飯局」相聚,已經係兩年前嘅事,難得係佢仍然記得我哋當日飯局嘅對話,今次一嚟到「帝苑廳」,詹Sir已急不及待開聲:「Paco,今次我聽你講嘞!去紅館開show,感受一吓萬幾位觀眾畀我嘅震撼!」

哈哈哈!猶記得上一次飯局,我同詹Sir講過,紅館唔單止係歌手,亦係藝人嘅事業指標,建議佢去紅館開show,我知道佢嘅show已經深入香港各區,不過紅館有萬幾個觀眾,對藝人嚟講,威力、推動力係全港之冠。 「我好同意Paco你嘅講法,所以我依家已經日日開會度橋,食埋呢一餐仲開始keep fit,試一個新造型畀觀眾睇,一定要fit過劉德華!」

嘩!詹Sir此言一出,再配合埋以下嘅台詞、「做手」(左圖),你不得不佩服,「華仔個show叫《Unforgettable》,我呢個就係『Unbelievable』,我要令所有入場嘅觀眾都估唔到我會有咁嘅演出! 「我啱啱話要fit過劉德華,並唔係講笑o架,我真係會操fit自己,呢個係依家第一個可以透露嘅驚喜。」

詹Sir邊講邊七情上面的扮劉德華(上圖),而且手舞足蹈(下圖),戲劇感十足!

紅棗大頭菜蒸海斑,有別於清蒸菜式。

淮揚拼盤各適其適,開胃最啱。

師徒crossover

「至於第二個驚喜,我可以話畀大家知,你諗到同諗唔到嘅人我都會扮。其實,我做過市場調查o架,我問過一啲記者最唔想睇我扮咩,結果佢哋個個都話:『詹Sir,你可唔可以唔好再扮女人呀?』

「我對民意好從善如流o架,既然記者朋友們唔想我扮女人,我今次一定會扮更多女人畀觀眾睇!所以,我奉勸所有同業,你哋少啲幽默感都唔好入場呀!」

哈哈哈!同詹Sir飯局係一種享受,佢絕對唔會容許氣氛有一秒係冷清嘅,而佢兩位高徒泰臣同蝦頭,依家喺年輕一輩,即係30歲左右或以下嘅舞台劇代表人物,全靠佢哋之前喺《潮性辦公室》嘅出色演出,為自己闖出一片天。而喺聖誕新年時份(23日至1月2日),詹Sir兩位高徒就再次開show,演出《情人眼裏出壽司(潮愛聖誕特別版)》,道盡時下年輕人嘅即食戀愛文化。

蝦頭(右)與泰臣甚有師父詹Sir風範。

黑松露菌雞茸燕窩羹,大玩中西crossover。

百花釀玉環係必備菜式。

速食愛情Sushi

雖然舞台劇喺7月已經公演過,但係一手一腳度橋製作嘅泰臣同蝦頭,話今次係全新橋段,仲率先披露畀「金牌飯局」嘅fans知道,先由泰臣講解以迴轉壽司作概念嘅原因:「依家好多年輕人對愛情嘅態度,都係要快、靚、正,啱唔啱都係要食咗先,同迴轉壽司嘅經營好相似,全部擺晒出嚟畀你揀,你揀慢啲碟壽司就走咗。我哋就用呢個概念做題材,發掘一啲趣味。」

蝦頭就話:「我哋喺今次嘅舞台劇入面,都會唱歌,我會扮學生妹,唱李麗蕊嘅〈小妹妹日記〉,要諗吓我同泰臣扮學生嘅喜劇感係好強嘅,我哋都想觀眾睇完個劇,可以思考吓自己對愛情嘅要求啦。」

好!今次我同詹Sir、泰臣、蝦頭,因為詹Sir少飲杯中物而以水代酒,祝三位good show!乾!

以水代酒,一樣咁啱feel!

蝦頭(中)之前仲演出過唔少電影,包括我製作嘅《絕代雙嬌》。

紅棗銀耳桂圓茶夠晒滋陰。

古法羊腩煲最暖笠笠!

意大利芝士蛋糕係完美嘅句號!

踢館Action!
詹Sir今次殺入紅館,喺2011年1月21日至22日舉行《踢館》騷,佢話不論外在抑或內在都要一新觀眾耳目,真係要拭目以待!

帝苑廳


地址:九龍尖沙咀東部麼地道69號帝苑酒店
電話:2733 2008