為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2020 年 11 月 25 日

疑學生會牽頭搞事 警檢閉路電視逐個捉

百名中大畢業生日前反轉校園,借記念去年爆發「二橋之戰」為名,手持「香港獨立」、「光復香港,時代革命」旗幟喺校園大搞遊行。呢次校方絕不手軟,第一時間報警。警方國安處人員隨即進入校園蒐證。消息人士透露,處方初步鎖定部分人物,當中包括部分學生會「舊莊」成員,據知有人疑掀起火頭呼籲「新莊」齊齊搞事,更一度喺社交群組「吹雞」,可惜吹極都無學生落疊,惟有急Call舊生頂上。國安處高度重視事件,將把搞事分子一併「落鑊」。
警方日前翻查中大多條閉路電視片段,又檢走多袋證物。今次遊行嘅部分示威者身份神秘,通通穿上畢業袍,睇落似學生,但就刻意戴上面具、口罩或「豬嘴」面罩,不敢以真面目示人。

逾百名畢業生喺校內遊行,部分人展示港獨橫額及旗幟。

 

有指學生會部分「舊莊」成員有份策劃校園遊行。

 


遮到密密實實以為無人認得出,但調查人員翻查當日出入校園嘅紀錄,初部鎖定遊行策劃者疑為學生會成員。消息指,有人雖已卸任多時,仍積極參與學生會活動,今次更呼籲「新莊」一齊策劃遊行。各人分頭喺社交群組「吹雞」,但部分學生們心知宣揚港獨隨時觸犯《港區國安法》,一於耍手擰頭。眼見人丁單薄,搞手惟有轉向畢業生埋手,呼籲「手足」加入增援。遊行當日,觀塘區議員兼中大畢業生陳易舜亦手持標語,批評校方以抗疫為名,取消實體畢業禮。
翻查資料,現任中大學生會幹事會臨時行政委員會主席區倬僖,以及上任學生會會長蘇浚鋒,都屬激進派。先講區倬僖,佢係中大社科院學生,曾任中大學生會會長,十五歲就參加「佔中」,其後一直活躍於 「港獨」 激進圈子,先後做過「本民前」梁天琦同「青年新政」梁頌恆參與選舉嘅助選團成員。
區倬僖喺一八年參選中大學生會當選後,就以本土派自居,鼓吹 「香港透過公投自決2047年命運、構建大學生的港人身份認同」 。由佢揸旗嘅中大學生會幹事會臨時行政委員會,競選期間已宣揚 「港獨」 係現行較可取嘅前途選項,隨即畀人話佢向新生洗腦。至於蘇浚鋒,任內有份將中大嘅「百萬大道」變為 「連儂牆」 ,稱文宣有助引起社會關注。今次學生會疑掀頭搞遊行,仲踩上國安法呢條紅線,睇怕真係有排頭痕。

警方翻查中大多條閉路電視片段及出入紀錄,已鎖定目標人物。