為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2020 年 11 月 24 日

走出抑鬱死胡同 尋覓快樂之泉

早年研究發現,香港有近一成人有抑鬱症狀,而一場疫情重挫社會、經濟與民生,社交限制下,港人終日愁困四面牆,患抑鬱症狀的比率大增至逾七成,不容小覷。而今期的主角,亦受抑鬱症困擾長達十年,但在這段疫情期間卻找到快樂泉源,重拾人生目標。

十多年前相繼中風及做過通波仔手術的強哥,自病後一直活在抑鬱的陰霾下而不自覺,幸得計劃的幫助,讓他重拾笑容,並找到快樂的原動力。

 

六十九歲的曾蘊強(強哥)腳步躝跚,手持枴杖來到位於大窩口的新生精神康復會安泰軒。甫坐下,他即支支吾吾說道:「我中過風,十年前通過波仔,唔係好識講嘢,唔好介意。」

自從參加計劃接受支援後,強哥(右二)笑言自己不再終日眉頭緊皺,並且認識到一班老友記和熱心社工,令以往平淡的生活添加了色彩。

 

身陷抑鬱泥沼

在長洲長大的強哥,自言自小雖不好讀書,卻興趣多多,無論是音樂、運動、藝術皆有涉獵,「呢幾十年經歷好多起跌,試過去巴西被人打劫,身無分文自己爬渠逃生,好多事都靠自己解決。」然而鐵人如他,十多年前先後經歷兩場大病,令他遽然發現,很多事已時不與我,「以前做會計好叻計數,電子同電腦嘢我都好有興趣鑽研,但通完波仔之後,醫生話我仲有一條心血管未通,大腦前額葉又開始退化,數字記唔到,電腦又唔記得點用,根本無得再返工、做運動,仲要成日有股心理壓力,唔知自己幾時會係咁先。」
強哥憶述當年六十未到已被迫退休,終日屈在家,過着猶如行屍走肉的日子,情緒亦不自覺地愈來愈壓抑,「以往花好多時間打理嘅盆栽同魚缸,全部都荒廢晒,個人做乜都提唔起勁,覺得自己好失敗,亦覺得其他人個個都對我有敵意,令我唔自覺築起咗面牆,唔想見人,但我當時唔覺得自己有病,反而覺得係身邊嘅人有問題,如今諗番先會發覺佢哋都係心懷好意。」他續說。
正如很多患抑鬱症的病人一樣,強哥即使患病亦不自知,與抑鬱症共處多年,「我個外甥孫女話我影相成日苦晒口面,我都唔覺。」直至二○一八年,他在家中腦海突然一片空白,不自主地萌生自殺的念頭,「我都控制唔到,唔知點解會咁諗,但呢啲負面想法令我好似身陷泥沼一樣,不能自拔,好在一個電話打來,救番我。」而當時致電給他的,正是新生精神康復會的社工兼個案督導張潤坤。
「強哥係其他機構轉介嘅個案,當時打畀佢同佢傾偈,一來了解佢嘅情況,二來希望可以先同佢建立關係,慢慢睇吓點幫佢。過程中,發現強哥好介意自己講嘢唔流利,因為咁個人無乜自信,更唔想同人傾偈。」張姑娘說罷,強哥即插嘴道:「當時佢每星期都打畀我,佢又唔識我,但好似朋友一樣關心我,令我覺得好溫暖。」
之後,張姑娘為強哥進行抑鬱程度評估(PHQ-9),發現廿七分為滿分,強哥的抑鬱指數達十分,病情屬於中度抑鬱。「好多長者失眠或飲食習慣突變,都會以為只係身體不適,其實同抑鬱症都有關。加埋如果好似強哥一樣,出現心情持續低落、失去動力、覺得自己好差,甚至有自殺念頭,就應該要及早接受治療。」她解釋。

今年七月,強哥(中)正式修畢「樂齡友里」的義工訓練課程,正式成為精神健康急救先鋒,讓他能將社工對他無私的關愛傳給其他同路人。

 

傳揚助人精神

在張姑娘的鼓勵和開解下,強哥慢慢重踏社區,開始參與安泰軒的認知行為治療小組,與其他同路人長者一起,分享自己的經歷,從中學習如何辨識及了解自己的情緒。「我哋會叫強哥寫情緒日誌,記低每日嘅喜怒哀樂情緒,同引發壓力嘅事件,令佢知道點解自己會開心同唔開心。」此外,張姑娘亦為他安排不同的「功課」,「好似佢鍾意聽歌,我就畀一堆佢鍾意聽嘅歌畀佢,叫佢下次見面之前聽晒佢。」她續說。
過程中,強哥笑言認識了一班同路人,彼此成為朋友互相支持,而他更視張姑娘為可信的朋友,不時與她交心,「舊年我美國有親人都有情緒問題,想幫又幫唔到佢,於是同張姑娘講,點知佢搵美國朋友幫我問意見。」人生高跌有時,而當時強哥亦頃刻明白,在人生低潮時有朋友的幫忙與開解,正是最佳的良藥。「經過個別輔導之後,再同強哥做評估,佢嘅抑鬱指數只得三分,好大進步,於是我邀請佢成為『樂齡友里』義工,以過來人身份勉勵其他長者。」
張姑娘口中的「樂齡友里」義工,與強哥接受的輔導服務,同為賽馬會樂齡同行計劃旗下的服務,計劃由香港賽馬會慈善信託基金捐助撥款及主導策劃,並與全港四十二間社區中心合作,提供長者抑鬱症介入治療服務,而強哥亦在今年七月成功修畢精神健康急救證書課程,成為樂齡友里義工。「強哥要負責定期同三位抑鬱症長者聯絡,運用課程所學,開導佢哋嘅情緒。呢三位長者,強哥都叫佢哋做大哥。」說罷,強哥即道:「呢段疫情期間只可以電話同網上見,同大哥傾偈我覺得好開心,佢哋又開心。」
馬會慈善事務部主管梁淑儀表示:「有見計劃第一階段服務能有效支援受情緒困擾的長者,我們決定開展第二階段,將規模擴展至全港十八區,培訓五千個如強哥一樣的精神健康急救生力軍,持續增強社區的抗逆力,推動長者身心健康。」
這段助人的經歷,令強哥建立人生的目標,並找到快樂。如今計劃踏入第二階段,他亦打算繼續進修,成為升級版義工「樂齡之友」,把張姑娘施予在他身上的善心,傳揚開去。「強哥將要接受八十小時嘅訓練,同三十小時實習,學習輔導同溝通技能,幫手辨識同協助身邊嘅抑鬱症長者。」張姑娘說。對於這項未來的小挑戰,強哥說:「呢兩年我學識接納自己身體狀況只會愈來愈差,但我都會努力去試,去令自己同人哋開心。」

張姑娘提醒,如發現身邊長者在過去十四日內,睡眠和飲食習慣出現大轉變,且終日悶悶不樂、對身邊事物失去興趣,便應盡快求助。

 

              賽馬會樂齡同行計劃 電郵:jcjoyage@hku.hk
                    網址:www.jcjoyage.hk 電話:3917 1758