為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 07 月 12 日

政府大轉軚倡填海 林鄭黃遠輝矛盾漸現

土地供應專責小組與政府之間嘅鴻溝日漸擴大,雙方近日嘅言論更顯示,土地小組嘅步伐完全跟唔到政府。據了解,特首林鄭月娥早已明言,土地諮詢「大辯論」須喺九月前有初步結論,以便十月出爐嘅《施政報告》敲定土地及房屋政策,但土地小組一再以問卷設計有阻滯為由,推遲至十二月,令林鄭對小組失去耐性,決定開展填海可行性研究。

據政府中人透露,「政府急市民所急,已經等唔切。」事關民間對土地供應嘅訴求殷切,政府內部都相當心急,「同事對應否填海原本係十五十六,家吓唔少都轉軚支持,覺得土地供應唔可以再拖。」

事實上,填海對香港唔係新鮮事,屯門、大埔等六個大型新市鎮都係填海得嚟,但整體填海面積只佔全港土地面積嘅百分之六,目前比例唔高。近年更愈來愈少填海工程,團結香港基金曾有報告指出,過去十幾年填海創造出嚟嘅地比二十年前減少近九成。

近日政府大轉軚撐填海,林鄭透露會喺十月《施政報告》中處理有關問題,仲話自己「大膽講」要靠填海至解決到問題。

其實商界唔少聲音都曾表態支持填海,例如合和集團創辦人胡應湘,佢在唔少場合都同人呻過,話土地小組咁樣諮詢好無謂兼浪費時間。佢從來都係「填海派」,之前接受訪問時講過,香港新土地以往都係填海得來。

一一年林鄭仲做緊發展局局長時,曾做過相關嘅大規模研究,不過當時社會共識不足,令填海計劃未能上馬。林鄭做咗特首後,本屆政府內部對如何調控樓市一直有唔同睇法,而林鄭就想先由土地小組試水溫,再配合政府出招。點知小組一出閘就脫腳,由諮詢方法到時間表都被詬病,o依家甚至連九月都出唔到報告。加上過去半年樓價癲升,對政府確有壓力。近日政府大轉軚撐填海,七月一日林鄭與傳媒茶敍時,已急不及待話會喺十月《施政報告》中處理有關問題,唔等土地小組十二月報告,又話小組提出嘅部分增地選項「濕濕碎碎」,自己「大膽講」要靠填海至解決到問題。

消息人士話,林鄭原本對土地小組寄予厚望,卻一再失望,而政府和小組主席黃遠輝嘅不和更開始浮面,近日黃多次公開跟政府唱反調,對於政府高唱嘅「填海論」,佢回應話任何人(包括特首及高官)都唔可以凌駕諮詢結果。就咁睇嚟,呢個小組恐怕有機會成為棄卒。

土地小組嘅諮詢頻頻甩轆,小組主席黃遠輝與政府嘅不和開始浮面,黃更多次公開跟政府唱反調。

 

填海對香港唔係新鮮事,好多新土地都係填海得嚟,但過去十幾年嘅填海工程減少,填海地比二十年前減少近九成。