為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 05 月 10 日

街工爆勞資糾紛  傳梁耀忠派「無情雞」

以爭取工人權益作招徠嘅街工,最近被指無理解僱員工。五.一勞動節前夕,傳出街工會派「無情雞」畀三名員工。最弔詭嘅係佢哋唔係被裁,而係六月起被停薪,呢個做法唔湯唔水,搞到三人遣散費又無,人工又無得出。

據悉,被開刀嘅員工全部用街工立法會議員梁耀忠嘅議員津貼畀人工,受僱九至十五年不等,人工一萬五千至一萬九千蚊,三人除咗處理勞工議題,仲會去街工轄下嘅「勞工組」處理工人求助。佢哋嘅人工連同「勞工組」辦事處租金開支約五萬幾蚊,都有議員津貼補助。「只要梁耀忠仲係議員,無理由養唔起佢哋。」有員工說。

其中一名受影響員工王曉君炮轟梁耀忠「打茅波」,「佢話出埋五月尾份糧就停我哋薪,又叫我哋無糧出都可以返嚟做義工。咁即係點?唔係炒,而係停薪。無糧出,又無遣散費。」

據悉,街工有人喺WhatsApp群組內解釋,呢個安排係因為籌款情況欠佳。但另一位受影響員工譚亮英批評,今次解僱係「莫須有」,與一向重視勞工權益嘅街工形象背道而馳,「炒人都要畀我知我做錯乜嘢?佢(梁耀忠)口口聲聲話有財赤,但又唔肯拎本帳目出來一五一十講清楚,咁同無良僱主有乜分別?」

四面楚歌嘅梁耀忠於是急急發聲明,澄清至今未有向「勞工組」員工發出任何解僱或裁員通知,強調「裁員非解決財困的首選方法」,會繼續提出多個資源調撥建議,以及籌款方案解決問題。

雖然佢猛呻財赤嚴重,本刊翻查街工新近三年嘅公開資料,發現每年都有盈餘。以一六年為例,該組織有約三十萬元課程收入,比一五年嘅約十六萬元增長近八成,扣除該年度嘅營運開支後,仍有約八萬八千蚊,一六年嘅盈餘約七十九萬蚊,銀行存款則約有五萬九千蚊。

似乎財政情況唔算差,咁點解要炒人?政圈流傳被炒嘅三人唔係梁耀忠心腹。另外,六十五歲嘅梁耀忠仍未有退意,下屆想循「超級區議會」連任立法會議員,引起工會內部分人士不滿,兩名區議員周偉雄及梁錦威就先後退出,街工目前只剩三名區議員,地區樁腳薄弱咗,睇嚟梁耀忠如果真係想連任,會有唔少暗湧。

昔日為工人爭取權益嘅街工,如今爆勞資糾紛,三名以街工立法會議員梁耀忠嘅議員津貼支薪嘅街工職員,聲稱接獲梁耀忠(圓圖)通知,六月起停薪。

 

譚亮英(前右)批評,梁耀忠無理解僱,同無良僱主無分別,「炒人都要畀我知我做錯乜嘢?」