為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 04 月 15 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

宣戰影圈

良禽擇木而棲,所以以演技同觀眾緣著稱嘅宣萱(Jessica),已加盟好拍檔古天樂開設嘅經理人公司,作電影、電視雙線發展,一於「大小通吃」。古仔做老闆,同合作多年嘅經理人兼戰友Ronnie,仲發掘咗唔少演藝新血,收歸旗下,今次「Paco巨星飯堂」,我就邀得Jessica,率領三位小師弟:吳肇軒、胡子彤同朱鑑然(Kevin),全部俱為影壇新力量!

我帶四位去到位於尖沙咀嘅「國金軒The Mira」,品嘗米芝蓮星級嘅中菜,暢談事業大計。

喺軒仔、子彤同Kevin(左一、左二、右一)三位電影新血身邊,Jessica自稱「後輩」,佢話原因係三位小師弟嘅電影演出經驗,比佢更加豐富,真係謙虛。

優化經典

Jessica事業得意,去年她喺TVB劇集《不懂撒嬌的女人》嘅「Mall姐」,角色深入民心,令佢大感滿足。「好滿意!我有五年冇喺電視出現,但都可以有咁嘅迴響,真係好好彩。」

簽約古仔嘅經理人公司,Jessica即刻有更好嘅消息——《尋秦記》電影版落實開拍,主角繼續有好拍檔古仔同林峯,劇迷嘅集體回憶,即時返晒嚟。「暫定九月先會開始拍,o依家連劇本都未收到,導演暫時都未搵過我傾,但係我都好期待,因為大家咁多年無合作,以前大家都係TVB做經理人,兜兜轉轉咁多年,又變番喺同一間公司做嘢。喺工作上,我哋係一個聚會,對觀眾嚟講亦都係好好,因為好難得我哋三個再合作。

「喺五月我先會拍一套《犯罪現場》,係關於殺人嘅戲,同古仔、張繼聰合作,今次終於唔使再做人質,但詳細內容就未公開得住。」

轉換工作環境,Jessica直言想喺電影上有更多嘅新嘗試。「拍咗廿幾年戲,以前自己喺電影嘅戲份都唔重。o依家唔同咗,加上我係一個對自己有要求嘅人,會想用唔同嘅方法去演繹,電影同電視劇嘅表達方法好唔同,前者得兩個鐘去交代故事,會細膩一啲,而且觀眾嘅要求都唔同,人哋俾得錢入場,你都要交到嘢俾人睇,我希望大家嚟緊會見到一個唔同嘅宣萱。」

我帶四位嘉賓,去到位於尖沙咀嘅「國金軒The Mira」,品嘗米芝蓮星級嘅中菜,暢談喺影視界嘅大計。

 

簽約古仔公司後,Jessica坦言希望喺影圈大展拳腳,今年最矚目嘅作品,就首推二人加上林峯合演嘅《尋秦記》電影版。

 

Jessica喺《微博之夜》上,憑《不懂撒嬌的女人》得到「給力女主角獎」同「給力熒幕組合獎」,今年佢繼續突破自己,真係要拭目以待。

 

蔥香薑茉西班牙八爪魚海蜇頭($99/位) ,為凍食的前菜,以中式口味配上西式食材,冰鎮後拌上京蔥、乾蔥及薑末調味。 加埋蜜餞义燒皇(例牌$218),選用本地脢頭豬肉,肉質鬆化無渣。

 

金湖玉林影紗窗($168/位,需要48小時前預訂)白蘿蔔先以冰糖及胡椒燴煮,味道清甜,如寶盒珍藏黃耳、榆耳、雪耳、竹笙、蜜豆及杞子等珍菌及養生食材,由甘筍及南瓜蓉調味,清新怡人。

 

欖菜辣子爆龍蝦($428/隻),採用約一斤重波士頓龍蝦,鮮味啖啖肉,欖菜油爆後滲出鹹香,配以辣椒乾及淮鹽,帶避風塘風味,香口惹味!

 

望奸到底

有幾唔同?Jessica話:「咁多年我都好想做衰人(奸角),但係喺舊公司演嚟演去都係專業人士,可能因為我嘅外型啦!但係我喺演內地劇嘅時候,都有試過做一個大婆嘅角色,日日開工就鬧或者打啲妾侍,嗰時演得好開心,哈哈!

「如果o依家有機會俾我演一個衰人,我希望呢個角色係會衰到底嘅,即係唔好隨劇情而改邪歸正,要一氣呵成衰到尾!」

Jessica渴望突破,三位小師弟就想作多方面嘗試,去年同嘉玲姐喺電影《以青春的名義》演師生戀人嘅軒仔,只得廿四歲,今年仲有唔少作品排隊出爐。「我同老闆(古仔)、鎮宇哥、靚靚會喺《家和萬事驚》合作,仲有我演藝學院嘅師兄達Ming哥做我爺爺;另外喺黑哥(姜皓文)演變性人嘅《翠絲》入面,我就飾演佢個仔。我仲係新人,想演多啲唔同類型嘅角色。」

即將開始新戲嘅拍攝工作,Jessica自然全情投入,但佢話最希望演繹一次歹角,我祝佢願望早日成真。

 

去年Jessica擔演嘅劇集都大受歡迎,今年佢就喺電影上會有唔少發揮,連當事人都十分期待。

 

 

 

去年同嘉玲姐喺《以青春的名義》合作,軒仔(右二)今年其中一部作品《家和萬事驚》,就繼續同具實力嘅巨星袁靚靚、鎮宇、達Ming(左二起)同老闆古仔合作。

 

摩利菌棗皇燉螺頭(例牌$598),來自雲南嘅棗皇,比一般紅棗大得多,摩利菌香氣馥郁,與螺頭隔水同燉四小時,清香滋潤,讓人一再回味!

 

酥薑芙蓉星斑球($248/位),東星斑起肉,蒸過後淋上蛋白,鮮味嫩滑,以炸過的瑤柱絲提香,鋪上炸薑絲,再由粒粒黑醋珠,帶出鮮味。

 

滿腹大計

去年子彤就憑《點五步》,成為金像獎嘅「最佳新演員」,即將廿六歲嘅佢,o依家每星期都會上演技課,吸收科班知識。「《點五步》嘅角色,同我一樣係棒球運動員,要真正演得好,就一定要進修,同好似老闆咁有經驗嘅演員合作,就一定學到好多嘢。我哋三個都有份演出《明日戰記》,入面仲有青雲哥、謝君豪等影帝,俾到好多實戰經驗我。」

同樣係運動員出身嘅,仲有之前喺劇集《無間道》中飾演「洛威」嘅Kevin。「我讀大學嘅時候已經兼職做model,但真正接觸演戲,係一四年參與演出《破風》,同彭于晏、崔始源合作,再拍過《骨妹》。o依家有咁多機會,俾我演唔同嘅角色,每一次演戲我都feel到自己成長緊。」

三位「小鮮肉」嘅外型各有千秋,加上簽得出色經理人,要喺影圈大放異彩,自然事半功倍。

 

子彤係上屆金像獎「最佳新演員」得主,其後佢再鑽研演技,

 

Kevin為前香港游泳代表隊成員,加上下苦功操練,大隻形象深入民心。

 

香檳啫喱芒果布甸配椰汁柚子西米露($108/位),芒果布甸、香檳啫喱、柚子西米露疊出層層豐富口感,由椰汁芳香融會貫穿,品嘗前特別於盛器注入茉莉花茶,花香飄送,色香味俱全。

 

金瑤蟹肉桂花銀絲(例牌$238),花蟹拆肉,配以分別蒸煮及炸香嘅瑤柱與粉絲同炒,香氣撲鼻,海鮮甜味與瑤柱甘香融合,滋味非常。

 

生財好事顯貴脆皮雞(半隻$298,需要48小時前預訂),皮脆肉嫩的炸子雞,參照手撕雞做法,起肉後,與切碎嘅金蠔、蠔豉、火方及蜆芥拌勻,以清脆爽甜嘅羅馬生菜包住食,分外滋味。

 

國金軒The Mira 地址:九龍尖沙咀彌敦道118-130號美麗華廣場The Mira Hong Kong 3 樓 電話:2315 5222