為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 03 月 11 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

狗年利是股繼續派

雞犬交接前後,投資氣氛逆轉,開年後股市回彈,淡友又驚係「蛋散」(彈彈下會散)。我就維持大市向好嘅長遠展望,今年我揀嘅利是股分別係騰訊(0700)、平保(2318)、復星(0656)和中石化(0386),驟眼睇好似樣樣有,不過我唔係大包圍,四隻股份有一個分拆概念貫穿,有進一步上升誘因和動力。

安里控股主席兼行政總裁黃偉康(Andrew)認同港股未見頂,佢認為今年恒指會上到38,000點,最牛甚至去到42,000,主要因為美國核心數字未見有問題,而且港股股值偏低。有投資者擔心人行去摃杆,但睇返一月份人民幣新增貸款創新高,所以佢唔擔心人行會急劇收水。不過Andrew認為要留意有個別中資股之前擴張過快,導致要出售資產減債,呢類企業重整活動對A股會有影響。佢舊年已睇好資源股,但認為今年會真正爆發,而見到近期鋼鐵股出盈喜,產能過剩問題逐步解決,基建項目落實,所以順理成章派出利是股馬鞍山鋼鐵(0323)。

中國金洋資產管理董事總經理郭家耀(Matthew)覺得二月份嘅調整,主要由於市場需要時間適應新利率環境,但睇返基本面,企業盈利一路有改善,可以支持市況穩定落嚟。雖然債息破三厘指日可待,但市場現時相對強健,唔會咁易被推冧。Matthew見到外國投資者急於沽貨時,中資仍然好積極買貨。大市會較波動,但唔建議「一股不留」,長線判斷大市向上,點都留啲貨,如害怕大跌市可增持一點現金,以便在下面作彈性部署。板塊方面佢認為龍頭科技股會繼續蠶食傳統行業市場,而通脹重臨鼓勵消費,可留意食品消費股。不過Matthew派嘅利是股係港交所(0388),佢叫大家唔好立刻拆,因為0388嘅持倉會以年計。

宏匯資產管理董事及投資策略總監林嘉麒(KK)最關心市場用乜嘢藉口見頂,如果係短期系統性問題如XIV,下調理由並不實在。KK較擔心美國股份估值高,今年企業盈利能否支撐估值,但睇返二○一七年第四季企業業績幾理想,市場亦收貨。另一方面,中港股份股值上移呢點冇變,而且港股通互動資金多咗,對港股走勢睇好,38,000點樓上嘅觀點不變。佢睇好教育類股份,皆因業績對辦,亦能夠運用上市集資拓展業務,企業現金流強,學費係預繳嘅,冇壞帳問題,而且多隻被納入港股通,所以利是股就係睿見教育(6068)。

康證董事黃敏碩(Michael)就留意美國政策和債息,會否影響環球資產配置,但研究西水,不如睇返北水對港股嘅影響更加切實。今年中資股盈利加上經濟向好,令佢對大市樂觀。對於恒指佢偏向審慎樂觀,有機會上35,000,但睇恒指不如睇國指,佢認為可以去到15,000,意味中資股盈利和估值會提升。Michael認為中國對於5G和電動車嘅國策影響最大;5G概念股中佢唔推電訊商,因為要花資金做基建,減少派息,佢睇好設備股,如長飛光纖(6869);而捉住電動車脈絡,佢推介電池相關股份洛陽鉬業(3993)。最後一封利是係高鑫零售(6808)。

黃敏碩、林嘉麒、陸叔、郭家耀和黃偉康(由左至右)再向大家派狗年利是股。