為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 03 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

奇妙恩典

人只要懷住感恩嘅心,自然可以「化負」、「抗負」,令人生充滿正能量。即將喺四月於紅館開show嘅小恩子黎瑞恩,就以「感恩有你」作演唱會主題,以佢嘅奇妙旅程,發放正能量。

我同小恩子去到位於上環嘅「Moon Thai」,品嘗特色嘅泰國菜,細說開show前嘅準備工夫。

為咗喺4月5、6兩日舉行嘅演唱會中,以最佳狀態示人,小恩子已閉關練舞,配合適量運動,到時以好歌會知音。

 

繽紛Bollywood

時隔十六年再踏紅館,小恩子今次嘅演唱會以「感恩有你」為主題,佢話:「因為我覺得整個人生都要感恩,我自問讀書唔算叻,竟然有機會加入樂壇,唱咗大家都喜歡嘅歌,雖然只係唱咗六、七年歌就淡出,又生咗一對仔女,但仍然有歌迷一直支持我,出道二十八年仲可以開演唱會,又有嘉賓幫手,咁神奇,點可以唔感恩呢?

「今次好好彩,入咗紙四次就申請到喺紅館開show,之後我啲朋友又message我或者打俾我,問使唔使幫手做嘉賓,佢哋真係好有心。」

今次個唱之後,小恩子打算轉型幕後做製作人,所以佢趁今次機會,花盡心思搞gimmick,要同歌迷喺紅館共創健力士紀錄。「因為贊助商有薯片產品,我諗住八千幾人一齊咬薯片,出嚟嘅效果係咩聲?應該好震撼喎!於是我聯絡相關嘅單位,佢哋都願意派評判嚟做見證,仲會頒證書俾每個觀眾,點知紅館顧及清潔問題唔批准,就算我話自己俾清潔費都唔准,咁我惟有諗過第二條橋。」

小恩子仲話,今個月就開始閉關練歌排舞。「我好鍾意Bollywood嘅感覺,新歌會注入印度元素,演唱會仲有一大班人,齊齊跳嗰啲bling bling舞,畫面色彩豐富。不過大家放心,我唔會露臍!」

我同小恩子去到位於上環嘅「Moon Thai」,品嘗特色嘅泰國菜,細說開show前嘅準備工夫。

 

演唱會以「感恩有你」為主題,又以色彩絢爛嘅Bollywood特色作舞台設計,小恩子表示要藉着演唱會,發放正能量。

 

泰式燒豬柳($118),以秘制燒汁襯托燒得香口嘅豬柳,為清邁近鄉郊各街頭隨處可見嘅小食,極具泰國地道特色。

 

總廚曾任泰皇御廚,由佢發辦炮製嘅八小碟($98),以萬金葉摺成杯型,放入蝦米、椰絲、花生碎、薑、青檸粒等配料及汁料,為下酒淺嘗最佳配搭,亦屬皇宮接待上賓及盛會不可缺少嘅菜式。

 

招牌煲仔翅($388),翅由日本專門店採購,翅身呈金色且質感彈口,配上以老雞、雞骨,用大火煲足六小時嘅湯底,十分滋味。

 

全新感覺

一六年復出錄製Hi-Fi發燒碟《Vfresh感恩》,翻唱別人的歌,小恩子冇預計過會獲得IFPI「十大銷量廣東唱片」,今個月尾佢將會推出新碟,包括一張全新發燒碟同EP,現正主打嘅〈剩下光年〉,仲有Wyman黃偉文度身訂造填詞,描寫佢現階段嘅心境。「唔好成日掛住講以前,世界轉變咗,就要出去學習新事物,咁可能會遇到更好嘅事,曾經擁有嘅舊事可以保留,但唔可以逗留,你話啱唔啱?」

所以小恩子就搵咗初次合作嘅雷頌德(Mark),做新碟嘅監製,希望有多啲新嘗試,「發燒碟係中西樂兼備,編曲方面會將所有歌曲串連,即係聽完一首,會喺不知不覺間去咗下一首歌。」

至於EP嘅兩首歌,都有別於小恩子嘅昔日風格,「唱歌要投放感情,我習慣衝把聲出嚟,但今次阿Mark要求我,要淡淡然咁唱出味道,要控制自己唔可以激動。仲有咬字,我不嬲都算係字正腔圓,今次就要拉長尾音,錄音嗰陣我個嘴形好誇張,咁唱live點算好?好彩唱熟咗都ok。」

閒時會下廚嘅小恩子,最拿手係煲老火湯,「人哋落一紮西洋菜、兩個陳腎煲湯,我就落幾紮、幾個,煲出嚟嘅湯特別濃。每次我煲親湯,都派好多俾朋友、同事飲。」

 

為咗月尾推出新發燒碟同新EP,早前錄音嘅時候,小恩子都喺IG上載花絮。

 

為咗演唱會,小恩子話要積極keep fit,早前喺台灣品嘗嘅美食,�dd71家就要忍吓口嘞!

 

青芒沙律拌原條桂魚($368),桂花魚肉起片沾上炸粉炸至金黃色,入口鮮滑,淋上汁料及腰果,更有風味。

 

飛天通菜($88),此菜得名事由有一位做菜者,見一名挑擔賣菜販,於落斜坡時滑倒,菜籃及菜全部飛起,同時有位懂武功之人,跳高接住菜籃。於做菜者構想下演變為將炒好嘅菜,由鑊拋出,由專人於最遠18米內用碟接住,極考功夫。

 

泰式炆元蹄($388),元蹄先炸約2-3分鐘,再以中火炆約45分鐘,相當juicy,另可加入咖啡或柯華田兩種口味。

 

子女坐鎮

新idea新歌以外,小恩子仲有一對支持媽咪開演唱會嘅子女,佢仲話,原來囝囝囡囡,喺五年前先知媽咪當年曾經係樂壇偶像。「因為我喺屋企從來都唔會播自己嘅歌或MV,都係我啲朋友同佢哋講,佢哋先知道我係歌手,聽過我嘅歌之後,都係〈一人有一個夢想〉啦,佢哋仲讚我唱歌好聽!」

小恩子現年十四歲嘅大女,舊年去英國升學,今年趁復活節假期,返港為媽咪嘅演唱會任「嘉賓」,「佢跳舞好叻,唱歌就唔使嘞!去英國讀書係佢自己鍾意,因為同學仔都去外國升學,佢清楚知道要照顧自己,我就俾佢試吓。

「起初有啲擔心,但係科技實在太先進嘞!我哋日日都FaceTime,我將電話擺喺枱,一邊做嘢一邊同佢傾,就好似佢喺香港咁,遲啲個仔大啲,我諗住再送埋佢去外國。」

對於教養小朋友,小恩子話自己都係承傳母親嘅教導。「由細到大,我都教佢哋要見人叫人,就好似每日要刷牙嘅習慣,要尊師重道、孝順長輩。一個人就算讀書成績再叻,但係人品衰都冇用,兩個差不多學歷的人,當然會揀有禮貌的一位。」

媽咪開演唱會,小恩子一對仔女都有機會上台,佢話囝囝囡囡會練舞表演,一聽就覺得好溫馨!

 

 

 

除咗落足料嘅老火湯,泡菜炒飯都係小恩子煮過嘅菜式。

 

咖喱蟹肉配薄餅($488),蟹肉炸至微金黃色,爆香後再加入配料,伴以薄餅更見惹味。

 

甜品拼盤($168),包括南瓜布甸、千層糕、西米糕及香芒糯米飯,各具特色。

 

Moon Thai
地址:上環蘇杭街83號香港蘇豪智選假日酒店2樓
電話:28511288