為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2018 年 02 月 12 日

關慧玲

《東周刊》社長兼總編輯。

馬時亨人脈廣闊的秘密

鐵主席馬時亨(Fred)(下圖)政商界人脈廣闊,早前專登去聽黃英豪單案判決,好多人都唔知兩人咁老友。早前在飯局中見到Fred問佢,至知佢其實跟黃英豪父親黃乾亨結交在先。

Fred仍係盛年,跟黃老先生年紀有番咁上下距離,點解會friendo架呢?Fred回憶認識黃老先生當年,佢已很出名,而自己就剛出道喺銀行做,佢好記得黃老先生不時請佢哋食飯,仲待佢哋一班初出茅廬嘅後生仔如上賓,令Fred受寵若驚,「講真那時乜嘢成就都未有,邊有人會請仔食飯o架?」黃、馬兩家就此結下兩代情誼,「所以佢個仔遇到事,我就支持吓朋友。」

你對人好人對你好,是Fred多年來做人的哲學,而這智慧,原來師承城中首富李嘉誠。「仍然喺熊谷組工作的年代,有天去佢哋公司傾嘢,在電梯口碰到自外面回公司的誠哥,他劈頭便說:『Fred你依家走呀,外面好大雨喎。』隨手便把自己用的雨傘給了他,更叮囑說不用還啦。」正因為誠哥待人謙厚,之後但凡佢公司開口話某啲Project要趕工,佢都份外上心。「把遮唔知去咗邊啦,但呢件事記到今日。」

Fred亦記得另一段人生印記。話說佢中學時代屋企窮到燶,爸爸不時拿不出錢給他交學費,「記得係每個月十六蚊,每次無錢,就去校務處求鍾主任幫忙延期,而佢每次都話無問題。」Fred話如果不是他,自己有機會無書讀,就真係無今日。

好多年後,Fred在銀行界工作得唔錯,某日收到鍾主任電話,「我個仔大學畢業,想入銀行界,可否畀個機會佢面試?」Fred聽罷即管一見這名後生仔,發覺他表現不錯,便依足程序聘請了他,「佢依家係一間大企業嘅行政總裁啦。」雖然這名叻仔未必要人幫都可以上位,不過有人扶一把,可以行少好多冤枉路,「這個世界,真係你幫人,人幫你。當年鍾主任幫我,等我完成學業有機會出人頭地,今日自己有能力,就幫返人。」得人恩果千年記,世事嘅嘢,有時真係話唔埋。