為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 12 月 06 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

得人心 得人才

香港新公布八至十月失業率降至3%,打工仔基本上唔憂搵唔到工,但係人才委托招聘公司仍然成行成市,因為有工作唔代表有好嘅職業規劃。以前招聘行業好兩極化,公司高層空缺會請獵頭公司獵人,文員秘書等又會請招聘公司代勞,中層經理級就由公司內部負責。而且當時招聘公司多數係通才,瓣瓣都做。經過多年發展,今日差不多每一階層嘅職位都有委托招聘,亦有不同工種嘅專門分工,招聘顧問對行業有更深入了解,可以做到最合適嘅配對。

上星期介紹過一對孖仔陳家安(Eddie)同陳家成(Jackson),佢哋創立KOS至今八年,今年仲請咗師傅楊碩碩(Louisa)過檔出任CEO,提升公司管理並開拓香港以外市場。Louisa被傳媒稱為招聘界嘅神奇女俠,除咗因為佢喺國際行時,成為第一位女行政總裁之外,仲因為佢身兼兩女之母,不但兩面兼顧,仲有時間經常跑步。佢話從來唔帶工作返屋企,亦從來唔帶家事返公司,要做得到,除咗要提高效率,仲要將工作同家庭分成兩個區間(Compartmentalizing),好似辦公室有兩度門咁,分得好清楚。屋企更加有晒時間表,家人跟住schedule作息,緊急事至搵佢,好有紀律部隊風範。

不過,公司團隊能否衷誠合作好重要。幾年前,公司已經由一間國際行請咗區翠雯(Connie)過來出任董事總經理,今次再請Louisa過檔前,Connie和孖仔創辦人一齊同團隊討論公司未來路向,得到團隊buy in,甚至連接待員都游說一番至行動,確保上下一心。

至於Louisa由跨國公司跳到本地創立嘅公司,佢話20年前喺舊公司建立金融專門團隊時都只係得4個人,都係慢慢建立團隊同擴大市場。反觀KOS已有近30人嘅團隊,而且好多員工同公司一齊成長,好有凝聚力同鬥志。

公司尚算年輕,已經獲得唔少客戶信任,主要原因係團隊嘅拚搏精神同專業態度。而且香港好多大型企業已由第二、三代管理人接棒,佢哋對管理有新理念,希望為家族生意注入創新思維,所以亦期望同啱「波段」嘅夥伴合作。KOS團隊敢於創新,有幹勁,能夠協助年輕掌舵人更新老牌企業嘅人才管理。

公司已經站穩腳步,未來會積極鞏固人才資料庫以取代項目為本嘅工作模式,並會開拓內地以及澳門等新市場。呢個團隊亦唔會急於求成,因為從事人才招聘唔可以短視,認識一個客戶或人才唔一定即時有生意,如果職位同人才唔配合亦唔好勉強,要跟隨客戶同人才一齊成長,長遠至有商機。

人才招聘係對人嘅行業,KOS當然重視自己員工嘅事業路,所以擴展業務會先考慮原有員工嘅晉升機會,之後至外聘人才。呢點我好贊成,因為一間公司嘅文化係成功關鍵,而文化要經過多年培養建立,唔係買返嚟嘅。做生意要得到客戶嘅信任,管理生意就要得到員工信服。要得到人才先要得到人心。

一對孖仔陳家安(左一,Eddie) 與陳家成(右一,Jackson) 創立人力資源公司KOS,邀得行內猛人楊碩碩(左二)及 區翠雯(右二)加盟。