為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 11 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

「磚」攻海外

我嘅投資組合裏面,「磚頭」佔咗一部分,其中香港當然係主要基地,但隨住香港樓價不斷飆升,海外買「磚」都係考慮之列。我買入嘅第一個海外物業喺澳洲悉尼。當時阿仔在當地讀書,我過去探佢見到物業價格相宜,生活環境好,加上當時係金融海嘯之後,澳元低至兌5港元,物業同幣值嘅升值潛力都唔錯,就買咗一個住宅單位畀阿仔自住,後來再買多一個單位樓花收租。

近年海外物業投資蔚然成風,除咗因為香港樓價高之外,海外物業管理同代理出租服務發展成熟,業主唔使操心,亦係原因之一。香港人鍾意去日本旅行,所以最近興起到當地買樓。我覺得日本嘅好處係比較穩定,治安好,但言語不通,而且物價較高。我呢個星期會去另一地方考察,睇吓當地房地產情況。

我會去嘅地方就係馬來西亞檳城。呢度未成為熱門地產投資嘅地方,不過舊年美國旅遊雜誌Condé Nast Traveller選咗全球十大最佳退休城市,檳城排第二,係唯一上榜嘅亞洲城市,其餘全部都係歐美城市。檳城入選,係因為擁有友善嘅政策,有歷史建築物又有國際水準嘅醫療設施,而且有靚海灘,交通便利。對於我哋嚟講,檳城嘅另一優點係地方社區嘅英語同華語水平高,文化相近容易溝通。

馬來西亞政府喺2000年推出「第二家園計劃」,畀擁有最少約92萬港元流動資產,同時有海外收入每月約18,500港元嘅50歲以下人士申請;50歲以上申請人門檻更低。對於購買價值約185萬港元以上房地產嘅申請者,存款要求更低。而且申請人毋須放棄原有國籍,唔使坐「移民監」就可以有10年無限制可續期出入境居留證,仲可以享受買樓9成按揭、買車免稅等優惠政策。一位申請人就可以攜同配偶、21歲以下未婚子女,以及60歲以上父母。

香港9月份私樓樓價指數再破紀錄,連續11個月創新高,因此海外投資的確可以考慮,但我始終認為投資物業係重大決定,一定要親身去視察。我就會出發去檳城睇樓同視察環境,返嚟再同大家報告當地嘅情況,分析係咪值得投資。

馬來西亞檳城被選為全球最佳退休城市第二名,當地政府為鼓勵移民,更降低申請門檻。