為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 08 月 13 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

「尋與迷」電子產品

從前大家認為會上癮係好似海洛英、可卡因、尼古丁等同有關嘅化學物質,隨着智能手機、平板電腦等電子產品日漸普及,成年人、青少年、以至兒童對先進電子產品係會真正上癮,據紐約大學斯特恩商學院(New York University Stern School of Business)嘅社會心理學家,亞當·阿爾塔(Adam Alter)喺佢《Irresistible: The Rise of Addictive Technology and the Business of Keeping Us Hooked, March 2017》,意譯:不可抗拒、讓我們欲罷不能兼對科技上癮的由來嘅新書內提到,現代人至少日花近3小時喺電子產品好似手機芒度,十幾歲仔有時足不出戶,可以幾個星期內留喺房玩電玩遊戲,當下呢種控制又令我哋迷戀成癮嘅生活行為原來已經好普遍。

二○一一年有個調查研究發現,我哋當中百分之四十一嘅人至少有一種迷戀成癮嘅生活行為,隨着更多社交網絡平台嘅誕生,電子產品如平板電腦與智能手機嘅不斷更新版,勢必令都市人更沉迷使用電子產品。有調查亦顯示學前兒童開始收看電視嘅年齡,中位數竟然係八個月大,開始使用個人平板電腦嘅年齡,中位數竟然係十六個月大,最近更有調查進一步顯示,學前兒童平均一歲已接觸智能電話,兩歲就接觸平板電腦,當中會陪伴着兒童使用電腦嘅家長約佔百分之六,百分之十三嘅小學生每日上網平均達三小時以上,電子產品嘅使用率愈普及,兒童沉迷使用電子產品亦愈趨惡化。

見到人工智能技術、科技網絡發展愈嚟越進步當然開心,但又令我擔心幾粒乖孫太早去接觸電子產品,將導致日後執筆寫字、堆砌積木等會遇到困難,影響視力同健康。事實上有機構調查發現百分之九十六嘅受訪者,喺使用電子產品後眼部都會感到不適。

據其他近似嘅問卷調查發現,百分之六十嘅成年人表示佢哋瞓覺時會將手機放喺身邊,有一半受訪者話佢哋會喺夜晚起身查看電子郵箱,有機在手無疑係方便咗大部分嘅城市人,拉近世界各地朋友嘅距離,任何時間都可以上網購物,兼搜索各適其適娛樂等資訊,即時滿足到大家生活需求,提高生活質素同效率嘅同時,阿爾塔就話,亦會令我哋無時無刻變得特別在意自己喺FB、Tweet、Instagram嘅訊息上得到幾多個「贊」(Likes),試問咁大家日常工作同生活又點會唔受到影響吖。

衞生署學生健康服務社會醫學顧問鍾偉雄醫生表示,六至十二歲兒童每日使用電子產品作娛樂用途,時間唔應該超過兩小時,家長與子女可以訂立使用電子產品規則,我更認為喺使用規則上加啲獎勵可能更加有效,家長亦應該陪同、鼓勵子女多啲接觸自然環境同外出運動。已經去世嘅蘋果教主史蒂夫·喬布斯(Steve Jobs)其實喺二○一○年接受採訪時,曾經提過佢嘅孩子絕少用iPad,實在好值得我哋反思去諗下點解囉。

本港的兒童愈來越早接觸電子產品,專家擔心會影響健康及日後的身心發展。