為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 07 月 17 日

撚化潮神 尹光

如果,這個世界真的有人是「生不逢時」的話,尹光,肯肯肯定是其中一個。

想當年他那些諧音「粗口」歌、疑似鹹濕歌、粗俗市井小市民心聲歌詞,都不會在電視看到、電台聽到,只能在街頭巷尾、街市屋邨等地方響出:「荷里活有間大酒店,三個肥婆學踢波……」或「雪姑七友七個小矮人,雪姑七友七個同埋條心……」當然仲有「你阿媽大減價益你阿爸……」

若然他遲出世六十年,在這個網絡「開放」時代,甚麼粗口、鹹濕嘢、食字亂噏、改歌詞、攞童話故事開「成人」玩笑等,根本就一「網」都係,亦冇人可以阻到你將之傳遍宇宙。

不過,這位其實從來未在廟街唱過歌的「廟街歌王」卻說,不會羨慕也不覺得「生不逢時」,反而認為今時今日,香港年輕人:「太難生存,根本冇生活可言。」

「我當年(七十年代)唱一晚歌,由六點唱到凌晨兩、三點,由尖沙咀巡到去荃灣,一晚搵到普通打工仔一個月糧啦!」

但係,今時今日的KOL,動輒都話自己有幾十萬一個月喎?

「你咪撚化阿叔啦!我都有『飛卜』專頁,有upload MV上youtubeo架,o靚仔!」

又係嘅,尹光其實早就是網絡紅人,剛剛推出不久的〈潮神〉MV,一個月未夠就有三十幾萬點擊率,十年前的經典之作〈少理阿爸〉,就更有驚人的過百萬點擊!

廟街歌王唱到上網,點擊率其實比某些KOL多不知幾多倍,但最喜歡的,還是面對觀眾「直接」唱。唔講你唔知,尹光其實成日開演唱會,近乎每個月一場,唱盡香港各大社區會堂表演場地,通常都冇乜宣傳,因為啲飛好快賣晒。

難怪,不願透露真實年齡(網上搵到的,未必準確),只說唱了六十年的尹光,依然「潮」到爆。

「近排最鍾意扮G-Dragon!總之G-Dragon係咁,我就要跟!」

就連講嘢用字,都一樣係潮神級。

「呢排見到年輕女仔,都係問『娘娘收咗幾多兵?』咁囉!」

 

 

〈潮神〉MV內,尹光扮G-Dragon rap歌,從歌詞到曲風,其實都非常「尹光」。

 

最好的時光

尹光的歌,一直陪伴很多香港人一齊成長,無論有冇完整聽過一首歌,某些歌詞都早就滲進我們的血液之中。

就如約訪問地點,第一個出現腦海的,一定是「去廟街榕樹頭影相,搵間舊式茶餐廳做訪問啦!」雖然最後還是去了沒有大酒店的荷李活……道,沒去廟街,但尹光卻似乎頗高興。

「其實呢,我真係從來冇喺廟街唱過歌o架!只係當年我其中一個音樂師傅,他在廟街開了一間歌廳,我一年一次去唱粵曲,根本冇唱過廟街!廟街歌王個名,係因為我當年啲歌,無辦法上電視台、電台,只有街邊播、街邊檔賣,咁當時就係得廟街,檔檔都係賣我啲歌,咁咪有呢個朵囉!」

尹光說,自己從越南偷渡來香港之後,到七二年才正式開始在油麻地的夜總會登台唱歌,七四年就推出第一張唱片《十四座》。

「其實出碟之前,我已經會自己錄卡式帶賣,唱粵曲,因為要每晚自己翻錄,所以最多只能日賣三十盒,每盒賣個半,一晚就收三十蚊,當時普通打工仔一個月都係三百蚊人工。唱荔園,一場唱兩首歌就收七蚊,係好好好好嘅收入,嗰時食碗雲吞麵斗零咋!

「我哋以前要生存、生活都好容易,搵錢機會多,而且物價好平,只要勤力肯做就得,o依家唔係喇!年輕人連生存其實都好困難。

「以前打份工會好有心,諗點樣幫老闆搵多啲錢,做長啲時間冇所謂,老闆亦好多時會睇住員工。我有個朋友喺澳門開酒樓,搵咗幾十年錢,退休移民前將間舖留低,分畀十幾個夥記,當係退休金又好、獎金又好。家陣?可能個員工留喺公司做耐啲,都俾老闆懷疑佢係咪想爆格啦!」

七四年推出的第一隻大碟《十四座》,就是與鍾叮噹合作,當年更在酒樓吃飯慶功。

 

(上)尹光視新馬仔為偶像,展覽中就把這幅合照掛在最當眼的位置。(下)七三、七四年與鍾叮噹登台合唱,是尹光成名的開始。